قر دەنساۋلىق ساقتاۋ مينيسترلىگى حالىقتىڭ مەديتسينا سالاسىنداعى ساۋاتتىلىعىن زەرتتەۋگە 20 ميلليون تەڭگە جۇمساۋعا دايىن، دەپ حابارلايدى “ادىرنا” ۇلتتىق پورتالى Halyq Uni سايتىنا سىلتەمە جاساپ.
Telegram-داعى «مەملەكەتتىك ساتىپ الۋ تۋرالى» ارناسى تاراتقان اقپاراتقا قاراعاندا، قىزمەت كورسەتۋشى ازىرلەگەن ساۋالناما مەديتسينالىق تاقىرىپتار بويىنشا كەمىندە 30 سۇراقتى قامتۋى ءتيىس. سونىمەن قاتار، HLS-EU-Q ستاندارتتى حالىقارالىق ساۋالناماسىنا (European Health Literacy Survey Questionnaire) نەگىزدەلۋى ءتيىس. وندا مەديتسينالىق قىزمەتتەردىڭ قولجەتىمدىلىگى، ەمدەلۋشىنىڭ دارىگەر جازىپ بەرگەن نۇسقاۋى مەن رەتسەپتتەرىن ءتۇسىنۋى جانە ازاماتتىڭ دەنساۋلىق ساقتاۋ سالاسىمەن ءوزارا ارەكەتتەسۋىنىڭ باسقا دا نيۋانستارى تۋرالى 47 سۇراق قامتىلعان.
زەرتتەۋدى ءبىر جىل ىشىندە قازاقستاننىڭ بەس قالاسىندا وتكىزۋ جوسپارلانۋدا:
- نۇر-سۇلتان جانە شىمكەنت – ارقايسىسىندا 700 رەسپوندەنت;
- الماتى – 800;
- وسكەمەن جانە اقتوبە – ارقايسىسىندا 400 ادام.
“ادىرنا” ۇلتتىق پورتالى
