تيمۋر قۇلىباەۆتىڭ Halyk قورىنىڭ «تالىمگەر» جوباسى ماڭعىستاۋ وبلىسىنىڭ كوللەدج ستۋدەنتتەرىنە اۋقىمدى مۇمكىندىك ۇسىندى. جاستار اراسىندا بيزنەس-يدەيالار، جوبالار جانە ستارتاپتاردىڭ «تالپىنحالىق – 2025» ايماقتىق بايقاۋى باستالدى.
بايقاۋدىڭ ماقساتى مەن اۋقىمى
بايقاۋدىڭ نەگىزگى ماقساتى – جاستاردىڭ كاسىپكەرلىك الەۋەتىن ارتتىرۋ، ولاردى يننوۆاتسيالىق ويلاۋعا باۋلۋ، جاڭا جوبالاردى جۇزەگە اسىرۋعا، توپتا جۇمىس ىستەي بىلۋگە جانە زاماناۋي كاسىپ داعدىلارىن مەڭگەرۋگە ىنتالاندىرۋ. بيىلعى ءىس-شارانى تيمۋر قۇلىباەۆ باستاعان Halyk قورىنىڭ «تالىمگەر» جوباسى كەڭ كولەمدە وتكىزبەك. وبلىستاعى بارلىق 26 كوللەدجدەن 80-نەن اسا ءوتىنىم قابىلدانعان.
ءوتىنىم قابىلداۋ جانە العاشقى ىرىكتەۋ
وبلىستا 10–15 قاراشا ارالىعىندا وتىنىمدەر قابىلداندى. وسى ۋاقىت ارالىعىندا ستۋدەنتتەر وزدەرىنىڭ تىڭ يدەيالارىن، ءوڭىر ءۇشىن ماڭىزدى، نارىقتا سۇرانىسقا يە بولا الاتىن جوبالارىن ۇسىنىپ، العاشقى قادامدارىن جاسادى. 15–20 قاراشا كۇندەرى ساراپتاۋ كەزەڭى ءوتىپ، ساراپشىلار القاسى جۇمىستاردى جان-جاقتى باعالاپ، جوبالاردىڭ ماڭىزدىلىعى مەن ىسكە اسۋ مۇمكىندىگىن سارالايدى. ناتيجەسىندە ستارتاپ-ۋيكەند فورماتىنداعى جارتىلاي فينالعا 40 جوبا ىرىكتەلدى.
«بىزگە كەلىپ تۇسكەن ءاربىر وتىنىمنەن جاستاردىڭ باتىلدىعىن، ىزدەنىسىن جانە ءوز وڭىرىنە پايدا اكەلۋگە دەگەن شىنايى نيەتىن كوردىك. تاڭداۋلى 40 جوبانى ىرىكتەپ الۋ وڭاي بولعان جوق، ويتكەنى كوپتەگەن يدەيالار شىنىمەن دە ىسكە اسىرۋعا تۇرارلىق. بۇل جاستاردىڭ الەۋەتى ماڭعىستاۋدىڭ ەرتەڭگى ەكونوميكالىق دامۋىنا قۋاتتى سەرپىن بەرە الاتىنىن كورسەتەدى»، – دەيدى ساراپتاۋ كوميسسياسىنىڭ وكىلى.
جوبانىڭ كەلەسى قادامى قانداي بولماق؟
20–30 قاراشادا «تالىمگەر» ورتالىعى ونلاين مەنتورينگ جۇرگىزىپ، ستۋدەنتتەرگە جوبالارىن جەتىلدىرۋگە كومەكتەسەدى. قاتىسۋشىلار پرەزەنتاتسيا، پيتچينگ، قارجىلىق مودەل جانە نارىققا بەيىمدەۋ داعدىلارىن مەڭگەرەدى. قاراشانىڭ سوڭىندا جارتىلاي فينال وففلاين وتەدى: العاشقى كۇنى ترەنينگتەر، كەلەسى كۇنى كوماندالار ءوز جوبالارىن كاسىپكەرلەر مەن ساراپشىلاردان قۇرالعان جيۋري الدىندا قورعايدى.19 جەلتوقساندا فينالدا ستارتاپشىلار جوبالارىن كاسىپكەرلەر مەن ينۆەستورلارعا تانىستىرادى. ۇزدىك جوبالار گران-پري، 1–3 ورىندار جانە ارنايى نوميناتسيالار، سەرتيفيكاتتارمەن ماراپاتتالادى.
ء«بىز جاستاردى ۇنەمى قولدايمىز. ال بۇل بايقاۋ – جاي عانا جۇلدە ءۇشىن جارىس ەمەس، ءار ستۋدەنتتىڭ وزىنە دەگەن سەنىمىن وياتىپ، كاسىپكە العاشقى قادامىن جاساۋىنا بەرىلگەن مۇمكىندىك. ياعني، سوزبەن ايتىلعاندى ىسپەن دالەلدەۋ الاڭى. ءبىز ءۇشىن ەڭ ۇلكەن جەڭىس – جاستاردىڭ كوزىندەگى وت، جاڭا يدەياعا دەگەن ۇمتىلىستى كورۋ»، – دەيدى بايقاۋدى ۇيىمداستىرۋشى «تالىمگەر» جوباسىنىڭ وكىلى.
