پرەزيدەنت قاسىم-جومارت توقاەۆ الەمدىك جانە ءداستۇرلى دىندەر كوشباسشىلارىنىڭ VII سەزىنە قاتىستى. بۇل تۋرالى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
الەمدىك جانە ءداستۇرلى دىندەر كوشباسشىلارىنىڭ VII سەزى دۇعا جاساۋ ءۇشىن ءبىر مينۋتتىق ۇنسىزدىكتەن باستالدى.
«الەمدىك جانە ءداستۇرلى دىندەر ليدەرلەرىنىڭ پاندەميادان كەيىنگى كەزەڭدەگى ادامزاتتىڭ رۋحاني جانە الەۋمەتتىك دامۋىنداعى ءرولى» اتتى پلەنارلىق وتىرىستى اشقان مەملەكەت باسشىسى قازاقستان ءۇشىن الەمنىڭ ەڭ قۇرمەتتى رۋحاني كوشباسشىلارىن بىرگە جيناپ، ديالوگ ورناتۋ ۇلكەن قۇرمەت ەكەنىن اتاپ ءوتتى. پرەزيدەنت ءوز سوزىندە الەمدەگى ەڭ بەدەلدى رۋحاني كوشباسشىلاردىڭ باسىن قوسىپ، ديالوگ قۇرۋ ەلىمىز ءۇشىن زور مارتەبە ەكەنىن اتاپ ءوتتى. پرەزيدەنت ۆاتيكان مەن كاتوليك شىركەۋىنىڭ باسشىسى ريم پاپاسى فرانتسيسككە، ەڭ كونە ءال-ازھار يسلام ۋنيۆەرسيتەتىنىڭ جوعارعى يمامى شەيح احماد ات-تايەبكە، ورىس پراۆوسلاۆ شىركەۋىنىڭ وكىلدەرىنە، ءيزرايلدىڭ باس اشكەناز ءراۆۆينى داۆيد لاۋعا، ءيزرايلدىڭ باس سەفارد ءراۆۆينى يتسحاك يوسيفكە جانە فورۋمنىڭ بارلىق قاتىسۋشىسىنا ءوزىنىڭ ءىلتيپاتىن ءبىلدىردى.
ء“بىزدىڭ شاقىرۋىمىزدى قابىل الىپ، قازاقستانعا كەلگەندەرىڭىز ءۇشىن بارىڭىزگە العىس ايتامىن. بۇل بەيبىتشىلىكتى ساقتاۋعا جانە وركەنيەتارالىق ديالوگتى نىعايتۋعا ءبارىمىزدىڭ مۇددەلى ەكەنىمىزدى كورسەتەدى. وزگەرىسكە تولى ءارى بەلگىسىزدىك بەلەڭ العان قازىرگى زاماندا بۇگىنگى باسقوسۋدىڭ ايرىقشا ءمانى بار. ءبىزدىڭ سەزد وركەنيەتارالىق ديالوگ ورناتاتىن جاھاندىق دەڭگەيدەگى القالى جيىنعا اينالدى. بۇل فورۋمدى وتكىزۋگە قازاقستاننىڭ باستاماشىلىق ەتۋى بەكەر ەمەس. سەبەبى قازاق جەرى عاسىرلار بويى باتىس پەن شىعىستىڭ اراسىنداعى كوپىر بولىپ كەلەدى. وسىندا، ياعني ۇلى دالا تورىندە نەبىر الىپ كوشپەلى يمپەريالار ءومىر سۇرگەن. ءدىني ۇستامدىلىق – ولاردىڭ بارىنە ورتاق سيپات”، – دەدى قاسىم-جومارت توقاەۆ.
“ادىرنا” ۇلتتىق پورتالى
