وسكەمەندە قىزىنىڭ "ەرنىنەن ءسۇيدى" دەلىنگەن اكەگە قاتىستى تەكسەرىس اياقتالدى. بۇل تۋرالى بۇگىن، 16 قاراشادا ءىىم اكىمشىلىك پوليتسيا كوميتەتى يۋۆەنالدى پوليتسيا باسقارماسىنىڭ باستىعى اسحات دۇيسەمبەكوۆ ايتتى، دەپ حابارلايدى «ادىرنا» ءتىلشىسى.
ول پوليتسيا اتالعان دەرەك بويىنشا تەكسەرۋ جۇرگىزگەنىن جەتكىزدى.
«قىلمىس قۇرامى بولماعاندىقتان، ماتەريالداردى نومەنكلاتۋرالىق ىسكە ەسەپتەن شىعارۋ تۋرالى شەشىم قابىلداندى»، – دەدى دۇيسەمبەكوۆ.
ال وقۋ-اعارتۋ ءمينيسترى جۇلدىز سۇلەيمەنوۆا ۆيدەوداعى جاعدايدى «قارىم-قاتىناستىڭ جول بەرىلمەيتىن فورماسى» دەپ باعالادى.
«بيىل ءبىز جاڭا ءپاندى، ياعني «جەكە قاۋىپسىزدىك» كۋرسىن ەنگىزدىك. ونىڭ اياسىندا جەتىنشى سىنىپتان باستاپ وقۋشىلارعا ارنالعان ارنايى تاقىرىپتار مەن وقۋ ماقساتتارى قاراستىرىلعان. ولاردى بالالارعا پەداگوگ-پسيحولوگتار تۇسىندىرەدى»، – دەدى مينيستر.
سۇلەيمەنوۆانىڭ ايتۋىنشا، بالالار قانداي ارەكەتتىڭ دۇرىس ەكەنىن، ال قايسىسى ولاردىڭ جەكە شەكاراسىن بۇزاتىنىن ءتۇسىنۋى كەرەك.
بۇعان دەيىن جەلىدە ەر ادامنىڭ قىزىن تۋعان كۇنىمەن قۇتتىقتاپ، ەرنىنەن سۇيگەن ءساتى تۇسىرىلگەن ۆيدەو قىزۋ تالقىلاعان ەدى. 13 قاراشادا شقو پوليتسيا دەپارتامەنتى تەكسەرۋ ماتەريالدارى كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى قالالىق كوميسسياعا جولدانعانىن حابارلاعان.
وبلىس اكىمدىگى دە ءتيىستى ماماندار وقيعانىڭ ءمان-جايىن زەردەلەپ، وتباسىنا قاجەتتى قولداۋ كورسەتكەنىن مالىمدەگەن. ال قىزدىڭ اكەسى ءوز قۇقىقتارىن سوت تارتىبىمەن قورعاۋعا نيەتتى ەكەنىن ايتقان ەدى.
پوليتسيا تەكسەرۋىنىڭ قورىتىندىسى بويىنشا قىلمىس قۇرامى دا، اكىمشىلىك قۇقىق بۇزۋشىلىق بەلگىلەرى دە انىقتالماعان.
