2024 جىلى ۇستىنە ەسكەرتكىش قۇلاپ، قازا تاپقان جەتى جاستاعى قىزدىڭ ىسىنە قاتىستى سوت ۇكىمى بيۋست اۆتورى، ورالدىق ءمۇسىنشى دميتري بايمۋكاشەۆتى كىنالى دەپ تانىدى، دەپ حابارلايدى "ادىرنا" ۇلتتىق پورتالى kznews اگەنتتىگىنە سىلتەمە جاساپ.
ءمۇسىنشى 1 جىل 6 اي مەرزىمگە باس بوستاندىعىنان ايىرىلدى. ول سونداي-اق جابىرلەنۋشىلەرگە وتەماقى تولەۋگە مىندەتتەلدى.
ال ەسكەرتكىشتى ورناتۋعا، قابىلداۋعا جانە باقىلاۋعا جاۋاپتى بولعان شەنەۋنىكتەر مەن مەردىگەرلەر ءىس بويىنشا كۋاگەر رەتىندە عانا تانىلعان.
قايعىلى وقيعا 2024 جىلدىڭ ماۋسىم ايىندا اتىراۋداعى جەڭىس ساياباعىندا بولعان. قاتتى جەل سوققان ساتتە سالماعى 200 كەلىدەن اساتىن بيۋست ورنىنان قوزعالىپ، جەرگە قۇلاعان. سول ماڭدا ويناپ جۇرگەن جەتى جاستاعى قىز اۋىر جاراقات الىپ، اۋرۋحانادا كوز جۇمدى.
تەرگەۋ بارىسىندا ەسكەرتكىشتىڭ جوباسى مەن تەحنيكالىق ساراپتاماسى بولماعانى، ال نىسان ءتورت جىل بويى بالانستا تىركەلمەگەنى انىقتالدى. ياعني، ەسكەرتكىش زاڭسىز ورناتىلعان.
ءمۇسىنشى بايمۋكاشەۆ سوتتا ءوز كىناسىن مويىنداماعان. ول تەك ەسكەرتكىشتى جاساعانىن، ال مونتاج جۇمىستارىن جەرگىلىكتى كاسىپكەرلەر اتقارعانىن ايتقان.
«پاندەميا كەزىندە وڭىرگە بارۋ مۇمكىن بولمادى، ورناتۋمەن باسقا ادامدار اينالىستى»، — دەدى ول.
قازا تاپقان قىزدىڭ اكەسى سوت شەشىمىمەن كەلىسپەيتىنىن مالىمدەدى. ونىڭ پىكىرىنشە، اكىمدىك پەن باقىلاۋشى ورگاندار دا جاۋاپقا تارتىلۋى ءتيىس ەدى.
