Foto: Beineden skrin
Temırtau maŋynan ekı ai būryn ız-tüzsız joǧalǧan 38 jastaǧy äieldıŋ bölşektelgen mäiıtı tabyldy, dep habarlaidy “Adyrna”.
KTK deregınşe, ony öltırdı degen küdıkpen bırge tūrǧan 40 jastaǧy er adam ūstaldy.
Arna mälımetınşe, İrina Kern 20 qyrküiekte joǧalyp ketken. Aldyn ala mälımet boiynşa, sol künı ol küieuımen janjaldasyp, üiden şyǧyp ketken. Äieldı ızdeuge erıktıler men äskeri qyzmetkerler jūmyldyryldy. Olar qyzmettık itterdıŋ kömegımen orman alqaptaryn, saiajailardy jäne zirattardy teksergen. Alaida ızdeu jūmystary nätije bermedı.
Äielmen bırge tūrǧan azamat onyŋ üiden jiı ketıp qalatynyn aitqan. Tıptı ızdeu jūmystaryna özı de qatysqan. Keiın er adamnyŋ osy ıske qatysy bar degen küdıkke ılıngenı belgılı boldy.
Marqūmnyŋ dene qaldyqtary Temırtaudan 22 şaqyrym jerdegı şipajai aumaǧynan tabylǧan. Küdıktı atalǧan mekemede ot jaǧuşy bolyp jūmys ıstegen. Äieldıŋ artynda üş balasy qaldy. Kenje balasy – üş jasta.
«Qylmysqa qatysy bar degen küdıkpen 40 jastaǧy er adamdy anyqtap, ūstadyq. Ol uaqytşa ūstau izoliatoryna qamaldy. Atalǧan faktı boiynşa qylmystyq ıs qozǧaldy», – dedı Temırtau qalalyq polisiia basqarmasynyŋ bastyǧy Talǧat Bakaev.
Polisiia mälımetınşe, mäiıttı qarau kezınde zorlyq-zombylyq belgılerı anyqtalǧan.
