شىمكەنت قالاسىنىڭ مامانداندىرىلعان اۋدانارالىق سوتى 21 جاستاعى نۇراي سەرىكبايدىڭ ولىمىنە قاتىستى قىلمىستىق ءىس بويىنشا ۇكىم شىعاردى، دەپ حابارلايدى "ادىرنا" ۇلتتىق پورتالى.
سوت شەشىمىمەن 28 جاستاعى شەرحان ايماحان ءومىر بويىنا باس بوستاندىعىنان ايىرىلدى. سوتتالۋشى نەكەگە تۇرۋعا ماجبۇرلەۋ، ستالكينگ جانە اسا قاتىگەزدىكپەن ادام ءولتىرۋ باپتارى بويىنشا كىنالى دەپ تانىلدى.
تەرگەۋ ماتەريالدارىنا سايكەس، قايعىلى وقيعا 11 قاڭتاردا شىمكەنت قالاسىندا بولعان. شەرحان ايماحان دۇكەندەردىڭ ءبىرىنىڭ ماڭىندا نۇراي سەرىكبايدى اڭدىپ تۇرىپ، وعان بىرنەشە رەت پىشاق سۇققان. اۋىر جاراقات العان بويجەتكەن قازا تاپقان. شابۋىلدان كەيىن كۇدىكتى وقيعا ورنىنان قاشىپ كەتكەن. الايدا كوپ ۇزاماي شىمكەنتتەن شامامەن 10 شاقىرىم جەردەن ۇستالىپ، ۋاقىتشا ۇستاۋ يزولياتورىنا قامالعان.
نۇراي سەرىكبايدىڭ ءولىمى قوعامدا ۇلكەن رەزونانس تۋدىردى. وسىدان كەيىن مەملەكەت باسشىسىنىڭ تاپسىرماسىمەن شىمكەنت قالالىق پوليتسيا دەپارتامەنتى قىزمەتكەرلەرىنىڭ ارەكەتىنە قاتىستى تەكسەرۋ جۇرگىزىلدى. تەكسەرۋ ناتيجەسىندە قالالىق پوليتسيا دەپارتامەنتىنىڭ باستىعى مەن ونىڭ ءبىرىنشى ورىنباسارى قىزمەتىنەن بوساتىلدى. سونىمەن قاتار بىرقاتار پوليتسيا قىزمەتكەرى جۇمىستان شىعارىلدى.
بۇدان بولەك، قۇقىق قورعاۋ ورگاندارى نۇراي سەرىكبايدىڭ بۇعان دەيىن نەكەگە ماجبۇرلەۋ بويىنشا بەرگەن ارىزىنا ءتيىستى شارا قولدانباعان پوليتسيا قىزمەتكەرلەرىنىڭ ارەكەتىنە قاتىستى جەكە قىلمىستىق ءىس قوزعادى.
سوت ۇكىمىمەن شەرحان ايماحان ءومىر بويىنا باس بوستاندىعىنان ايىرۋ جازاسىنا كەسىلدى.
