فوتو Ritchie B.Tongo / EPA / TASS
NVIDIA كومپانياسىنىڭ بۇرىنعى باسشىسى دجەنسەن حۋانگتىڭ جەكە ومىرىنە قاتىستى داۋ ودان ءارى ءورشي ءتۇستى. شەتەلدىك باق-تا ونىڭ كومپانيانىڭ تاعى ءبىر قىزمەتكەرىمەن كوڭىل جاراستىرعانى تۋرالى اقپارات تارادى. مالىمەت ونىڭ قىزمەتىنەن كەتەتىنى جاريالانعاننان كەيىن بەلگىلى بولعان. بۇل تۋرالى The Quint باسىلىمى جازدى، دەپ حابارلايدى “ادىرنا”.
The Quint مالىمەتىنشە، حۋانگتىڭ تاعى ءبىر قىزمەتكەرمەن قارىم-قاتىناستا بولعانى تۋرالى اقپارات NVIDIA ديرەكتورلار كەڭەسى ونىڭ وتستاۆكاسىن رەسمي تۇردە جاريالاعاننان كەيىن بىرنەشە ساعات وتكەن سوڭ تاراعان.
الايدا بۇرىنعى توپ-مەنەدجەرمەن بايلانىسى بولعانى ايتىلعان قىزمەتكەردىڭ ەسىمى جاريالانعان جوق. NVIDIA وكىلدەرى مەن كومپانيانىڭ ديرەكتورلار كەڭەسى بۇل اقپاراتقا قاتىستى ازىرگە تۇسىنىكتەمە بەرمەگەن.
ەسكە سالايىق، جاساندى ينتەللەكتكە ارنالعان چيپتەر وندىرەتىن NVIDIA كومپانياسىنىڭ 63 جاستاعى باسشىسىنىڭ جەكە ومىرىنە قاتىستى اقپارات قازان ايىنىڭ سوڭىندا تاراي باستاعان.
العاشىندا حۋانگتىڭ كاسىپكەر ەليس حۋانگپەن جاقىن قارىم-قاتىناستا بولعانى تۋرالى مالىمەت شىقتى. سونىمەن قاتار اقش ارنايى قىزمەتتەرى ونىڭ قىتاي بارلاۋ قىزمەتىمەن بايلانىسى بولۋى مۇمكىن دەگەن كۇدىككە ىلىنگەنىن حابارلاعان. وسى وقيعالاردان كەيىن كومپانيانىڭ ديرەكتورلار كەڭەسى تاۋەلسىز تەرگەۋ جۇرگىزۋگە كىرىسكەن.
8 قاراشادا دجەنسەن حۋانگ قىزمەتكەرلەرگە جولداعان حاتىندا جۇبايىنا وپاسىزدىق جاساعانىن مويىنداپ، كەشىرىم سۇراعانى ايتىلدى.
كەيىن ونىڭ NVIDIA كومپانياسىنىڭ دەنساۋلىق ساقتاۋ باعىتى بويىنشا ۆيتسە-پرەزيدەنتى كيمبەرلي پاۋەللمەن دە قارىم-قاتىناستا بولعانى تۋرالى اقپارات تارادى. بۇقارالىق اقپارات قۇرالدارىنىڭ مالىمەتىنشە، پاۋەلل بۇرىن حۋانگكە تىكەلەي باعىنعان قىزمەتكەرلەردىڭ ءبىرى بولعان.
جەكە ومىرىنە قاتىستى داۋ كۇشەيگەن تۇستا، 12 قاراشادا دجەنسەن حۋانگتىڭ NVIDIA باس ديرەكتورى قىزمەتىنەن كەتەتىنى جانە ديرەكتورلار كەڭەسىنىڭ قۇرامىنان شىعاتىنى جاريالاندى.
The Quint باسىلىمىنىڭ جازۋىنشا، قىزمەتىنەن كەتۋىنە بايلانىستى حۋانگ كومپانياداعى قۇنى شامامەن 108 ميلليون دوللار بولاتىن، ياعني قازىرگى باعام بويىنشا 48 ميلليارد تەڭگەدەن اساتىن تولەنبەگەن اكتسيالار پاكەتىنەن ايىرىلۋى مۇمكىن.
وسىلايشا، الەمدەگى ءىرى تەحنولوگيالىق كومپانيالاردىڭ ءبىرىن باسقارعان دجەنسەن حۋانگتىڭ اينالاسىنداعى داۋ ونىڭ جەكە ومىرىمەن عانا شەكتەلمەي، كاسىبي قىزمەتىنە دە اسەر ەتىپ وتىر.
ەسكە سالساق، 23 قازاندا اقوردادا پرەزيدەنت قاسىم-جومارت توقاەۆ Nvidia باسشىسى دجەنسەن حۋانگتى قابىلداعان بولاتىن. كەزدەسۋ بارىسىندا كومپانيا جەتەكشىسى قازاقستاندى Physical AI, ياعني روبوتتاردى، اۆتونومدى كولىكتەردى جانە وندىرىستىك پروتسەستەردى باسقاراتىن فيزيكالىق جاساندى ينتەللەكت سالاسىنداعى الەمدىك حابقا اينالدىرۋدى ۇسىنعان.
پرەزيدەنت كاسىپكەرگە ەلدەگى جي ەكوجۇيەسىنىڭ دامۋىنا قوسقان ۇلەسى ءۇشىن العىس ايتىپ، ونى ءى دارەجەلى «دوستىق» وردەنىمەن ماراپاتتاعان.
