فوتو: بەينەجازبادان الىندى
اقتوبە قالاسىندا بەس قاباتتى تۇرعىن ءۇيدىڭ ءبىرىنشى قاباتىندا ورنالاسقان ءدامحانادا گاز-اۋا قوسپاسى جارىلىپ، ارتى ورتكە ۇلاسقان. جارىلىس سالدارىنان عيماراتقا جاپسارلاس سالىنعان قۇرىلىس بولىگى وپىرىلىپ ءتۇستى. وقيعا كەزىندە ەكى ادام جاراقات الدى. بۇل تۋرالى تجم حابارلادى، دەپ جازادى "ادىرنا".
توتەنشە جاعداي 13 قاراشا كۇنى ساعات 10:28-دە تاۋەلسىزدىك داڭعىلى، 14/1 مەكەنجايىندا تىركەلگەن.
جارىلىستان كەيىن ءدامحانانىڭ قوسىمشا قۇرىلىسى قۇلاپ، ءورت شىققان. سونىمەن قاتار بەس قاباتتى تۇرعىن ءۇيدىڭ تەرەزەلەرى مەن تەرەزە كونسترۋكتسيالارىنا زاقىم كەلگەن.
وقيعا ورنىنا وبلىستىق توتەنشە جاعدايلار دەپارتامەنتىنىڭ قىزمەتكەرلەرى جەدەل جەتىپ، ءورتتى سوندىرۋگە كىرىستى. قۇتقارۋشىلاردىڭ كۇشىمەن جالىن ساعات 10:53-تە تولىقتاي اۋىزدىقتالدى.
جارىلىس سالدارىنان زارداپ شەككەن ەكى ادام جەدەل جاردەم قىزمەتىمەن اۋرۋحاناعا جەتكىزىلدى. الدىن الا مالىمەت بويىنشا، قازا تاپقاندار جوق.
قازىرگى ۋاقىتتا وقيعا ورنىندا توتەنشە جاعدايلار دەپارتامەنتىنىڭ باستىعى جۇمىس جۇرگىزىپ جاتىر. ءورتتى ءسوندىرۋ جانە ونىڭ سالدارىن جويۋ شارالارىنا 45 قۇتقارۋشى مەن 10 ارنايى تەحنيكا جۇمىلدىرىلعان.
قازىر ماماندار گاز-اۋا قوسپاسىنىڭ جارىلۋىنا نە سەبەپ بولعانىن جانە وقيعانىڭ وزگە دە ءمان-جايلارىن انىقتاپ جاتىر.
