پرەمەر-مينيستر تاپسىرماسىمەن اقتوبە وبلىسىندا بولعان جانتۇرشىگەرلىك جول اپاتىنىڭ سەبەپتەرىن انىقتاۋ ماقساتىندا ۇكىمەتتىك كوميسسيا قۇرىلدى، دەپ حابارلايدى "ادىرنا" ۇلتتىق پورتالى.
بۇل تۋرالى ۇكىمەتتىڭ ءباسپاسوز قىزمەتى مالىمدەدى.
ۇكىمەت باسشىسى كوميسسيا مۇشەلەرىنە تەرگەۋدى دەرەۋ باستاۋدى، جول-كولىك وقيعاسىنىڭ ءمان-جايىن جان-جاقتى زەرتتەۋدى جانە قازا تاپقاندار مەن زارداپ شەككەندەردىڭ وتباسىلارىنا العاشقى كومەك كورسەتۋدى تاپسىردى.
«پرەمەر-ءمينيستردىڭ ورىنباسارى قانات بوزىمباەۆ باسشىلىق ەتەتىن كوميسسيا قۇرامىندا ىشكى ىستەر، ەڭبەك جانە حالىقتى الەۋمەتتىك قورعاۋ، دەنساۋلىق ساقتاۋ جانە كولىك مينيسترلىكتەرىنىڭ جەتەكشىلەرى، سونداي-اق اقتوبە وبلىسى اكىمدىگىنىڭ وكىلدەرى بار»، — دەلىنگەن ۇكىمەت حابارلاماسىندا.
ەسكە سالايىق، 23 قازان كۇنى سامارا – شىمكەنت تاسجولىندا، بەلقوپا اۋىلىنىڭ ماڭىندا DAF جۇك كولىگى مەن جولاۋشىلار مىنگەن “گازەل” اۆتوكولىگى سوقتىعىسىپ، 12 ادام قازا تاپقان بولاتىن. تاعى بەس ادام ءتۇرلى جاراقات الىپ، اۋرۋحاناعا جەتكىزىلدى.
قازىرگى تاڭدا وقيعا ورنىندا تەرگەۋ توبى جۇمىس ىستەپ جاتىر. سامارا – شىمكەنت تاسجولىنىڭ اپات بولعان بولىگى ۋاقىتشا جابىلعان.
