يزرايل يران استاناسى تەگەرانعا زىمىرانمەن سوققى جاسادى. جارىلىس يراننىڭ IRIB TV3 تەلەارناسىنىڭ تىكەلەي ەفيرى كەزىندە ورىن الدى، دەپ حابارلايدى “ادىرنا”.
تەگەرانداعى زىمىران سوققىلارى يران مەملەكەتتىك تەلەراديو كورپوراتسياسىنىڭ شتاب-پاتەرىندە ايقىن سەزىلگەن. شابۋىل ساتىندە ەفيردە تىكەلەي حابار جۇرگىزىپ وتىرعان تەلەجۇرگىزۋشى ساحار ەمامي امان قالدى جانە كوپ ۇزاماي ەفيرگە قايتا ورالدى.
ء«سىز ەستىگەن جارىلىستار دىبىسى – بۇل شاڭ باسقان (كوشەلەر)…» – دەپ ۇلگەردى ايتۋعا جۇرگىزۋشى يراننىڭ حايفا مەن تەل-اۆيۆكە جاساعان شابۋىلى جايلى حابارلاپ جاتقان ساتتە.
كەيىنىرەك شابۋىلدان كەيىن يزرايل قورعانىس ارمياسىنىڭ (تساحال) رەسمي Telegram-ارناسىندا يراندىق مەملەكەتتىك تەلەراديو ورتالىعىنىڭ عيماراتى يران اسكەري كۇشتەرى تاراپىنان بايلانىس ورتالىعى رەتىندە پايدالانىلعاندىقتان شابۋىل نىسانىنا اينالعانى حابارلاندى.
«عيمارات ازاماتتىق ماقساتتا قولدانىلىپ جاتقانداي كورىنگەنىمەن، ونى يران قارۋلى كۇشتەرى اسكەري ماقساتتا پايدالانىپ كەلگەن. تەلەراديو ورتالىعىنىڭ ينفراقۇرىلىمى مەن رەسۋرستارىنىڭ اسكەري قىزمەتكە تارتىلۋى جاسىرىن بولعان»، – دەلىنگەن مالىمدەمەدە.
2025 جىلدىڭ 13 ماۋسىمى تاڭەرتەڭ يزرايل «ارىستاندار ۇلتى» وپەراتسياسى اياسىندا يراننىڭ يادرولىق جانە اسكەري ينفراقۇرىلىمدارىنا سوققى جاساعان. شابۋىل سالدارىنان يران يسلام رەۆوليۋتسياسى ساقشىلار كورپۋسىنىڭ (كسير) باس شتابىنىڭ باستىعى حوسسەين سالامي جانە يسلامدىق ازاد ۋنيۆەرسيتەتىنىڭ پرەزيدەنتى موحامماد تەحرانچي قازا تاپتى.
