قىرعىزستاننىڭ وش وبلىسىنىڭ نووكات اۋدانىندا سەل ءجۇرىپ، بەس ادام قازا تاپتى، - دەپ حابارلايدى “ادىرنا” ۇلتتىق پورتالى 24.kg سايتىنا سىلتەمە جاساپ.
بۇل تۋرالى توتەنشە جاعدايلار مينيسترلىگى، داعدارىستى باسقارۋ ورتالىعى باسشىسىنىڭ ورىنباسارى بايزاق وتوربەكوۆ راستادى دەپ ءتۇسىندىرىلدى.
«جەرگىلىكتى تۇرعىنداردىڭ ايتۋىنا سىلتەمە جاساعان ول، ءابشىر-اتا اۋدانىندا وزەن جاعاسىندا دەمالىپ جاتقان 6 ادامدى سەل شايىپ كەتكەنىن، كەيىن جەرگىلىكتى تۇرعىندار بەس ادامنىڭ ءمايىتىن تاۋىپ العانىن ايتتى»، - دەلىنگەن ماتەريالدا.
قازىر توتەنشە جاعدايلار مينيسترلىگىنىڭ قىزمەتكەرلەرى سەل سالدارىن جويۋ، قازا بولعاندار مەن زارداپ شەككەندەردىڭ جەكە باسىن انىقتاۋ جۇمىستارىن جۇرگىزۋدە.
كەشە، جۇما كۇنى ءتۇس اۋا نووكات اۋدانىندا جويقىن سەل بولدى. تولاسسىز جاۋعان جاڭبىردىڭ سالدارىنان سەل ون اۋلانى باسىپ، ءابشىر-اتا اۋىلىنداعى ەكى كوپىردى زاقىمدادى. تەسكەي-قوجوق اۋىلىندا 15 شارۋاشىلىق پەن جەرگىلىكتى مەكتەپ زارداپ شەكتى. قارا-بۇلاق اۋىلىندا لاي اعىندارى كولىك پەن كوپىردى بۇزىپ كەتكەن. ءتاجى-قىشتاق اۋىلىندا سەل جەتى اۋلا مەن بىرنەشە سارايدى باسىپ قالدى. وش-راززاقوۆ تاس جولىنداعى كوپىر زاقىمدانعان.
