25–26 ءساۋىر كۇندەرى ءۇرىمجى قالاسىندا ورتالىق ازيا حالىقارالىق ساۋدا-ەكونوميكالىق ىنتىماقتاستىق پالاتاسىنىڭ ۇيىمداستىرۋىمەن ەلەكتروندى ساۋدا كورمەسى ءوتتى. ءىس-شاراعا قازاقستان، قىرعىزستان جانە وزبەكستان ەلدەرىنەن كەلگەن كاسىپكەرلەر دەلەگاتسيالارى، سونداي-اق قىتايدىڭ ءتۇرلى وڭىرلەرىنەن ەلەكتروندى ساۋدا كومپانيالارى، لوگيستيكالىق ۇيىمدار جانە قىزمەت كورسەتۋ سالاسىنىڭ وكىلدەرى قاتىستى.
كورمە بارىسىندا قاتىسۋشىلار ءوز تاجىريبەلەرىمەن ءبولىسىپ، ترانسشەكارالىق ەلەكتروندى ساۋدا پلاتفورمالارىن، اقىلدى لوگيستيكا جۇيەلەرىن جانە تسيفرلىق تولەم شەشىمدەرىن تانىستىردى. ساراپشىلاردىڭ پىكىرىنشە، ەلەكتروندى ساۋدا بۇگىندە شىڭجاڭ مەن ورتالىق ازيا ءوڭىرى ەكونوميكاسىنىڭ ماڭىزدى قوزعاۋشى كۇشىنە اينالىپ وتىر.
سونىمەن قاتار، فورۋمدار مەن پىكىر الماسۋ الاڭدارىندا ترانسشەكارالىق ساۋدا، تسيفرلىق ەكونوميكا جانە حالىقارالىق ىنتىماقتاستىق ماسەلەلەرى كەڭىنەن تالقىلاندى. بۇل باستامالار ورتالىق ازيا ەلدەرىنىڭ كاسىپكەرلەرىنە سىرتقى نارىققا شىعۋعا، جاڭا سەرىكتەستەر تابۋعا جانە ەكسپورت كولەمىن ارتتىرۋعا مۇمكىندىك بەرەدى.
جيىن اياسىندا ورتالىق ازيا كاسىپكەرلەر قاۋىمداستىعى مەن ىنتىماقتاستىق تۋرالى مەموراندۋمعا قول قويىلدى. بۇل قۇجات تاراپتار اراسىنداعى ەكونوميكالىق بايلانىستاردى نىعايتۋعا جانە بىرلەسكەن جوبالاردى جۇزەگە اسىرۋعا جول اشاتىنى اتاپ ءوتىلدى.
گەوگرافيالىق ورنالاسۋىنا بايلانىستى قازاقستان قىتاي مەن ەۋروپا اراسىنداعى نەگىزگى ترانزيتتىك دالىزدەردىڭ ءبىرى بولىپ سانالسا، وزبەكستان وڭىردەگى وندىرىستىك جانە ەكسپورتتىق الەۋەتى جوعارى ەل رەتىندە ەرەكشەلەنەدى. ال قىرعىزستان شاعىن جانە ورتا بيزنەس پەن جەڭىل ونەركاسىپ سالالارى ارقىلى ترانسشەكارالىق ساۋدادا بەلسەندى ءرول اتقارىپ كەلەدى.
سوڭعى جىلدارى ءۇش ەلدە دە لوگيستيكالىق ينفراقۇرىلىم دامىپ، قويما، تاسىمال جانە كەدەندىك قىزمەت كورسەتۋ جۇيەلەرى جەتىلدىرىلۋدە. بۇل ىشكى جانە حالىقارالىق ساۋدانىڭ قارقىندى دامۋىنا ىقپال ەتۋدە.
سونىمەن قاتار، ورتالىق ازيا ەلدەرى ءبىر بەلدەۋ – ءبىر جول باستاماسى اياسىندا قىتايمەن ەكونوميكالىق بايلانىستارىن نىعايتىپ، ايماقتىق ساۋدا مەن لوگيستيكانىڭ ماڭىزدى بولىگىنە اينالىپ وتىر. بۇل ءوز كەزەگىندە ءوڭىردى تەك ترانزيتتىك ەمەس، وندىرىستىك ءارى ساۋدا حابى رەتىندە دامىتۋعا مۇمكىندىك بەرەدى.
قورىتىندىلاي كەلە، ۇرىمجىدە وتكەن بۇل كورمە قازاقستان، وزبەكستان جانە قىرعىزستان ءۇشىن تسيفرلىق ساۋدا سالاسىندا جاڭا مۇمكىندىكتەر اشىپ، وڭىرلىك ەكونوميكالىق ىنتىماقتاستىقتى نىعايتۋعا ماڭىزدى قادام بولدى.
ايدا قوجمامبەتوۆا
