قىتايدىڭ بريۋسسەلدەگى ديپلوماتتارى قحر-دىڭ "بىتىمگەرلىك كواليتسياسىنا" قوسىلۋ مۇمكىندىگىن زەرتتەۋدە. بۇل – رەسەيمەن اتىستى توقتاتۋ رەجيمى ورناتىلعان جاعدايدا، ءوز اسكەري قىزمەتكەرلەرىن ۋكرايناعا جىبەرۋگە دايىن ەلدەردىڭ بىرلەستىگى. بۇل تۋرالى Welt am Sonntag باسىلىمى جازدى، دەپ حابارلايدى "ادىرنا" ۇلتتىق پورتالى.
ەۋرووداق ديپلوماتيالىق ورتاسىنىڭ دەرەككوزدەرى قىتايدىڭ بۇل كواليتسياعا قوسىلۋى رەسەيدىڭ شەتەلدىك بىتىمگەرلەردىڭ ۋكراينادا بولۋىنا كەلىسىم بەرۋىنە ىقپال ەتۋى مۇمكىن ەكەنىن اتاپ ءوتتى. الايدا بۇل ماسەلەنى "كۇردەلى ءارى نازىك" دەپ سيپاتتادى.
قىتاي بيلىگى بۇل اقپاراتقا قاتىستى رەسمي مالىمدەمە جاساعان جوق.
ۋكرايناعا بىتىمگەر اسكەرىن جىبەرۋ مۇمكىندىگى تۋرالى العاش رەت فرانتسيا مەن ۇلىبريتانيا باسشىلارى مالىمدەدى. 17 ناۋرىزدا ۇلىبريتانيا پرەمەر-ءمينيسترى كير ستارمەردىڭ وكىلى بۇل باستاماعا 30-دان استام مەملەكەتتىڭ قوسىلۋعا دايىن ەكەنىن ايتتى.
The Times باسىلىمىنىڭ مالىمەتىنشە، بۇل كواليتسياعا ۇلىبريتانيا، فرانتسيا، تۇركيا، كانادا جانە اۆستراليا كىرۋى مۇمكىن. جوسپارعا سايكەس، ۋكرايناعا 30 مىڭعا دەيىن اسكەري قىزمەتكەر جىبەرىلەدى، ال باسقا ەلدەر قارۋ-جاراقپەن جانە لوگيستيكامەن قولداۋ كورسەتەدى.
الايدا گەرمانيا ۇكىمەتى بۇل ماسەلەنى تالقىلاۋ ءۇشىن تىم ەرتە ەكەنىن مالىمدەدى. اقپان ايىندا بەرليندە الدىمەن بەيبىت كەلىسىم جاسالۋ كەرەكتىگى ايتىلدى.
رەسەي سىرتقى ىستەر مينيسترلىگى ناتو جانە ەو ەلدەرىنىڭ ۋكرايناعا بىتىمگەرلىك كۇشتەرىن جىبەرۋ ماسەلەسىن "ورىنسىز جانە ابسۋرد" دەپ باعالادى.
رف ءسىم باسشىسىنىڭ ورىنباسارى الەكساندر گرۋشكو "يزۆەستيا" گازەتىنە بەرگەن سۇحباتىندا:
ء"بىز ءۇشىن بۇل اسكەرلەردىڭ قاي اتاۋمەن جىبەرىلەتىنى ماڭىزدى ەمەس: ەۋرووداق، ناتو نەمەسە ۇلتتىق دەڭگەيدە بولسىن. ەگەر ولار ۋكراينادا پايدا بولسا، بۇل ولاردى قاقتىعىسقا قاتىسۋشى تاراپ ەتەدى ", – دەدى.
