انتاليادا وتكەن COP31 كليماتتىق سامميتىندە ارمەنيا پرەمەر-ءمينيسترى نيكول پاشينيان مەن تۇركيا پرەزيدەنتى رەجەپ تايپ ەردوعان كەزدەستى. بۇل تۋرالى ارمەنيا پرەمەر-ءمينيسترى كەڭسەسىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
مالىمەتكە سايكەس، ەردوعان نيكول پاشينياننىڭ انتالياعا ساپارىن جانە كوشباسشىلار سامميتىنە قاتىسۋىن قۇپتاعان.
كەزدەسۋ بارىسىندا تاراپتار ارمەنيا مەن تۇركيا اراسىنداعى قارىم-قاتىناستى قالىپقا كەلتىرۋ ۇدەرىسىن تالقىلاپ، ونى ىلگەرىلەتىپ، تۇپكىلىكتى ناتيجەگە جەتكىزۋدىڭ ماڭىزىن اتاپ وتكەن. وسى رەتتە بۇعان دەيىن وتكىزىلگەن كەزدەسۋلەر مەن قول جەتكىزىلگەن كەلىسىمدەردىڭ، سونداي-اق ساۋدا-ەكونوميكالىق بايلانىستاردى ودان ءارى دامىتۋ شارالارىنىڭ ماڭىزدىلىعىنا توقتالعان.
سونىمەن قاتار تاراپتار وڭىردەگى احۋالعا قاتىستى پىكىر الماسقان. نيكول پاشينيان مەن رەجەپ تايپ ەردوعان ارمەنيا مەن ازەربايجان اراسىندا بەيبىتشىلىكتىڭ ورناۋى ايماقتىق ىنتىماقتاستىقتى دامىتۋعا جاڭا سەرپىن بەرگەنىن اتاپ وتكەن.
كەزدەسۋدە كولىك جانە كوممۋنيكاتسيالىق باعىتتاردى بۇعاتتان شىعارۋ ماسەلەسى دە قوزعالعان. اتاپ ايتقاندا، TRIPP جوباسىن ىسكە اسىرۋعا باعىتتالعان قادامدار تالقىلانعان.
ەسكە سالايىق، بۇعان دەيىن ارمەنيانىڭ قاۋىپسىزدىك كەڭەسىنىڭ حاتشىسى الەن سيمونيان 70 جىلدىق يدەولوگيا تۇركيانى جاۋ كورسەتكەنىن ايتقان ەدى.
