10 تامىز – اباي كۇنى. شىمكەنتتە ەل رۋحانياتى ءۇشىن ايرىقشا سانالاتىن مەرەكەنى اتاپ ءوتۋ 9 تامىزدان باستالدى. قازاقتىڭ ۇلى اقىنى اباي قۇنانبايۇلىنىڭ 177 جىلدىعىنا وراي شىمكەنت قالاسىنىڭ ورتالىقتاندىرىلعان كوپشىلىك كىتاپحانالار جۇيەسى ەكى كۇندىك «كىتاپ كەرۋەنى» اتتى جىلجىمالى كىتاپ كورمەسىن ۇيىمداستىردى.
«ۇلىلاردىڭ ۇلىسى – اباي» تاقىرىبىندا وتكەن ءىس-شاراعا شىمكەنتتىكتەر بەلسەنە قاتىستى. وقىرماندار اربات دەمالىس ايماعىندا كورمەگە قويىلعان اقىننىڭ ولەڭ جيناقتارى، قارا سوزدەرى، حيكمەت كىتاپتارىمەن تانىستى.
ۇيىمداستىرۋشىلار اباي قۇنانبايۇلىنىڭ ءومىرى مەن شىعارماشىلىعى تۋرالى قالا تۇرعىندارى اراسىندا ۆيكتورينالىق ويىندار ۇيىمداستىرىپ، جەڭىمپازداردى ماراپاتتادى.
ايتا كەتەيىك، جىلجىمالى كىتاپ كەرۋەنى اربات الاڭىندا بۇگىن كەشكى ساعات 20.00-دە جالعاساتىن بولادى. بۇدان بولەك، شىمكەنت قالاسىنىڭ ورتالىقتاندىرىلعان كوپشىلىك كىتاپحاناسىندا بۇگىن «اباي اندەرىن بىرگە شىرقايىق» اتتى ادەبي اۋەندى كەش وتەدى.
