«پاۆلودار-قىزىلوردا» اۆتوجولىندا تويوتا ماركالى كولىك جول ۇستىندە تۇرعان جىلقىعا سوعىلعان. اپات سالدارىنان ەكى جولاۋشى كوز جۇمدى، دەپ حابارلايدى "ادىرنا".
پوليتسيا تاراتقان مالىمەت بويىنشا، 2 قازان كۇنى اتامەكەن اۋىلىنان 17 كم جەردە، «پاۆلودار-قىزىلوردا» اۆتوجولىندا «Toyota Alphard» اۆتوكولىگى جىلقىعا سوعىلعان. جول اپاتى سالدارىنان كولىك جولدان شىعىپ كەتىپ اۋدارىلعان.
"جول-كولىك اپاتى سالدارىنان ەكى جولاۋشى قازا تاۋىپ، جۇرگىزۋشى جاراقات الدى. پوليتسيا اتالعان قايعىلى وقيعا بويىنشا قىلمىستىق ءىس قوزعادى. تەرگەۋ اياسىندا جىلقى يەسىنىڭ ءىس-ارەكەتىنە قۇقىقتىق باعا بەرىلەدى", — دەپ حابارلادى وڭىرلىك پوليتسيا دەپارتامەنتىنەن.
ءتارتىپ ساقشىلارى مۇنداي وقيعالاردىڭ الدىن الۋ ءۇشىن جول قوزعالىسىنا قاتىسۋشىلارعا جىلدامدىق رەجيمىن ساقتاۋ، كولىك قۇرالىنىڭ تەحنيكالىق جاعدايىن ۇنەمى باقىلاۋ ماڭىزدى ەكەنىن ەسكە سالادى.
تاجىريبەلى جۇرگىزۋشىلەر مۇنداي جاعدايلاردا كولىك شامىنىڭ جارىعىن ازايتىپ، جانۋاردى ۇركىتپەۋگە تىرىسادى. الايدا، مۇنداي ارەكەتتىڭ سالدارىن بىلمەيتىن كەي جۇرگىزۋشىلەر كەرىسىنشە — جارىقتى ءوشىرىپ-جانىپ نەمەسە كۇشەيتىپ، جانۋاردى ودان ءارى ۇركىتىپ جىبەرەدى. كوزى جارىققا شاعىلىسقان جىلقى باعىتىنان جاڭىلىپ، سول جارىققا قاراي ۇمتىلىپ، سوقتىعىسۋى مۇمكىن.
مۇنداي جاعدايلاردىڭ الدىن الۋ ءۇشىن جول-پاترۋلدىك پوليتسيا قىزمەتكەرلەرى جۇرگىزۋشىلەرگە جانۋارلارمەن جولدا كەزدەسكەن كەزدەگى قاۋىپسىز ارەكەت الگوريتمدەرىن ءتۇسىندىرۋى جانە ۇنەمى ەسكەرتۋ جۇمىستارىن جۇرگىزۋى ماڭىزدى.
