تالعاردا كىسى قولىنان قازا تاپقان 16 جاستاعى شەرزات پولاتتىڭ اپكەسى باقىت رەيموۆا ەلدەن كەشىرىم سۇرادى، دەپ حابارلايدى “ادىرنا” ۇلتتىق پورتالى.
الەۋمەتتىك جەلىدە تاراعان بەينەجازبادا باقىت رەيموۆا حالىققا العىس بىلدىرە وتىرىپ، ءوز قاتەلىگىن مويىندايتىنىن ايتتى.
“مەنى دە تۇسىنىڭىزدەر. ەكى باۋىرىمنان ايىرىلىپ وتىرعان ماعان دا وڭاي ەمەس. سول كۇنى اشۋ ۇستىندە بولدىم. بىرەۋ مەنى قورقىتىپ، ايتقىزىپ جاتىر دەپ ويلاماڭىزدار. مەن دە ءوز قاتەمدى بىلەم. قازاق ەلىنە باسىمدى يەم، راقمەت ايتام! قانشاما پىكىردى جىلاپ تۇرىپ وقىدىم. ەلدەن كەتپەس ءۇشىن مەن ءۇشىن دۇعا جاساپ جاتقاندار بار ەكەن. راقمەت! اللا رازى بولسىن. وتباسىلارىڭىز امان بولسىن،” – دەدى ول.
باقىت رەيموۆا اعاسى قارجاۋباي نۇرىموۆپەن بىرگە 15 تاۋلىككە قاماۋعا الىندى. بۇعان دەيىن ادۆوكات اسقار قايماقوۆ قارجاۋباي نۇرىموۆقا قاتىستى قر قك-ءنىڭ 202-بابى (“بوتەننىڭ مۇلكىن قاساقانا جويۋ نەمەسە ءبۇلدىرۋ”) بويىنشا قىلمىستىق ءىس قوزعالعانىن مالىمدەگەن. بۇل اقپاراتتى كەيىن پوليتسيا راستادى.
ايتا كەتەيىك، 2024 جىلدىڭ 4 قازانىندا الماتى وبلىسىندا ءبىر توپ جاس جىگىت 16 جاستاعى شەرزات پولاتتى اياۋسىز ۇرىپ-سوعىپ، سونىڭ سالدارىنان ءجاسوسپىرىم قايتىس بولعان. وقيعانىڭ ۆيدەوسى الەۋمەتتىك جەلىدە تاراپ، قوعامدا ۇلكەن رەزونانس تۋدىردى.
10 جەلتوقساندا پوليتسيا قارجاۋباي نۇرىموۆتى ۇستاعان بولاتىن. ونىڭ تۋىستارى شەرزاتتىڭ قازاسىنا ءادىل تەرگەۋ جۇرگىزۋدى تالاپ ەتكەن ەدى. بۇل وقيعالار كەزىندە نۇرىموۆتىڭ “پوليتسيا قىزمەتكەرىنە پىشاقپەن شابۋىل جاسادى” دەگەن ايىپ تاعىلعانى ايتىلدى. الايدا، كۋاگەرلەر بۇل مالىمەتتى جوققا شىعاردى.
شەرزات پولاتتىڭ قازاسىنان كەيىن 12 قازانعا قاراعان ءتۇنى ونىڭ وتباسىنىڭ ءۇيى ورتكە ورانعان. تۋىستارى بۇل وقيعانى كۇدىكتى تاراپتىڭ قاساقانا ارەكەتىمەن بايلانىستىرۋدا.
مارقۇمنىڭ تۋىستارى مەن قوعام بەلسەندىلەرى ءىستىڭ ءادىل تەرگەلۋىن تالاپ ەتۋدە. وقيعا ەل اراسىندا اشۋ-ىزا تۋدىرىپ، قۇقىق قورعاۋ ورگاندارىنىڭ جۇمىسىنا سىن ايتىلۋدا. قازىرگى تاڭدا تەرگەۋ جالعاسىپ جاتىر.
