رەسەي مەن ۋكراينا اراسىنداعى قاقتىعىستى رەتتەۋ جونىندەگى ابۋ-دابيدە وتەتىن ۇشجاقتى كەلىسسوزدەرگە ەۋروپا وكىلدەرى قاتىسپايدى. بۇل تۋرالى رەسەي پرەزيدەنتىنىڭ ءباسپاسوز حاتشىسى دميتري پەسكوۆ مالىمدەدى، دەپ حابارلايدى «ادىرنا» ءتىلشىسى Report اگەنتتىگىنە سىلتەمە جاساپ.
«الداعى كۇندەرى ابۋ-دابيدە رەسەي مەن ۋكراينا اراسىنداعى اقش-تىڭ دەلدالدىعىمەن وتەتىن ۇشجاقتى كەلىسسوزدەر ۇيىمداستىرىلادى. ەۋروپا وكىلدەرىنىڭ قاتىسۋىنا كەلسەك، امەريكالىقتاردىڭ ەۋروپالىقتارمەن، ۋكراينالىقتاردىڭ دا ەۋروپالىقتارمەن ءوزارا بايلانىس ورناتاتىن جەكە ارنالارى بار ەكەنىن بىلەسىزدەر. ولار قازىر ءوزارا ۇيلەستىرۋ تەتىگىن قالىپتاستىرىپ جاتقان سياقتى»، – دەدى ول.
بۇگىن Politico باسىلىمى ابۋ-دابيدەگى كەلىسسوزدەر كەزىندە ۇلىبريتانيا، فرانتسيا جانە گەرمانيانىڭ ۇلتتىق قاۋىپسىزدىك جونىندەگى كەڭەسشىلەرى «جاقىن ماڭدا بولاتىنىن» حابارلاعان ەدى. سونداي-اق باسىلىم كەلىسسوزدەردىڭ بارىسىنا قاراي اتالعان ەلدەردىڭ ودان ءارى قاتىسۋ ماسەلەسى شەشىلەتىنىن جازدى.
