كوپشىلىككە Navai لاقاپ اتىمەن تانىمال رەسەيلىك رەپەر ناۆاي باكيروۆ قازاقستاننان شىعارىلعاننان كەيىن ماسكەۋدە العاش رەت كونتسەرت بەردى. ول جانجالعا قاتىستى سۇراقتارعا جاۋاپ بەرۋدەن باس تارتتى، دەپ حابارلايدى «ادىرنا» ءتىلشىسى SHOT Telegram-ارناسىنا سىلتەمە جاساپ.
8 قاراشادا ماسكەۋدەگى كلۋبتاردىڭ ءبىرىنىڭ جانىندا تۇسىرىلگەن ۆيدەو جاريالاندى. ءدال وسى جەردە رەپەر Navai كونتسەرت وتكىزگەن.
كونتسەرت اياقتالعان سوڭ رەپەر تۇنگى ساعات 01:00 شاماسىندا كلۋبتان VIP-كىرەبەرىس ارقىلى شىققان. ونى جانكۇيەرلەرى مەن جۋرناليستەر كۇتىپ تۇرعان. Navai بىرنەشە جانكۇيەرىمەن سۋرەتكە تۇسكەنىمەن، جۋرناليستەردىڭ قازاقستاندا ۇستالۋىنا قاتىستى سۇراقتارىنا جاۋاپ بەرمەگەن.
كۇزەتشىلەر مۋزىكانتقا جاقىنداۋعا مۇمكىندىك بەرمەگەن. وسىدان كەيىن رەپەر سپورتتىق كولىگىنە وتىرىپ، وقيعا ورنىنان كەتىپ قالعان.
ەسكە سالايىق، 14 قازاندا Navai-ءدىڭ استانادا جوسپارلانعان كونتسەرتىنە جانكۇيەرلەرى قاتىسا المايتىنى بەلگىلى بولعان ەدى. ۇيىمداستىرۋشىلار كونتسەرتتىڭ وتپەيتىنىن حابارلاعان. سول كۇنى جامبىل وبلىسىنىڭ پوليتسيا دەپارتامەنتى Navai-ءدىڭ ەسىرتكى كونترابانداسىنا كۇدىكپەن ۇستالعانىن مالىمدەگەن. اتالعان فاكتى بويىنشا قىلمىستىق ءىس قوزعالىپ، رەپەر ۋاقىتشا ۇستاۋ يزولياتورىنا قامالعان.
ال رەپەردىڭ ديرەكتورى راۋف گۋسانوۆ ونىڭ ۇستالۋىنا قاتىستى پىكىر بىلدىرۋدەن باس تارتسا، اناسى بۇل جاعدايدى «ادەيى ۇيىمداستىرىلعان ارەكەت» دەپ اتاعان.
وسى وقيعادان كەيىن قىرعىزستاندا دا تەكسەرۋ باستالدى. شەكارا قىزمەتى مۋزىكانتتىڭ ەسىرتكىمەن شەكارادان قالاي وتكەنىن انىقتاۋعا كىرىستى. كىنالى تۇلعالارعا جازا قولدانىلۋى مۇمكىن.
15 قازاندا سوت رەپەردى قاماۋعا الۋ تۋرالى سانكتسيا بەرگەن. ونىڭ ادۆوكاتى رەنا كەريموۆا قورعاۋ تاراپى وعان ايىپپۇل تاعايىنداتۋعا تىرىساتىنىن مالىمدەگەن.
20 قازاندا Navai-گە قاتىستى قىلمىستىق ءىستىڭ اقتامايتىن نەگىزدەر بويىنشا توقتاتىلعانى بەلگىلى بولدى. سونداي-اق رەپەر قازاقستان اۋماعىنان شىعارىلدى. رەسەيلىك ادۆوكات دميتري مينوۆتىڭ ايتۋىنشا، قازاقستاندا بوساتىلعاننان كەيىن Navai-گە رەسەيدە دە قىلمىستىق ءىس قوزعالۋى مۇمكىن.
