قىتايدان وزبەكستانعا قازاقستاندى اينالىپ وتەتىن جاڭا تەمىرجول باعىتىنىڭ قۇرىلىسى جەلتوقسان ايىندا باستالادى، دەپ حابارلايدى "ادىرنا" ۇلتتىق پورتالى قازتاگ اگەنتىگىنە سىلتەمە جاساپ.
«قىتاي – قىرعىزستان – وزبەكستان» تەمىرجول قۇرىلىسى جوباسى ونداعان جىلدار بويى قاعاز بەتىندە عانا قالىپ كەلدى. ەندى ىسكە اسادى. ءبىز بۇل جوبانى باستاعاندا، كوپتەگەن ادام سەنبەدى، ءتىپتى ونى ەرتەگى دەپ مازاق ەتتى. ەندى ءبارى ونىڭ ەرتەگى ەمەس، ناقتى جوبا ەكەنىن كورىپ وتىر. 27 جەلتوقساندا رەسمي قۇرىلىس جۇمىستارى باستالادى»، — دەدى جاپاروۆ جۇما كۇنى قىرعىز حالقىنا جاساعان ۇندەۋىندە.
ونىڭ ايتۋىنشا، بۇل جول شىعىس پەن باتىستى بايلانىستىراتىن ستراتەگيالىق كوپىرگە اينالىپ، ساۋدا، تۋريزم جانە ونەركاسىپ ءۇشىن جاڭا مۇمكىندىكتەر اشادى.
«قىتايمەن شەكاراداعى «بەدەل» وتكىزۋ بەكەتىنىڭ اشىلۋى ەلدىڭ ترانزيتتىك الەۋەتىن ارتتىرىپ، جۇك جانە جولاۋشىلار اعىنىن جىلدامداتادى. بيزنەس ءۇشىن جاڭا مۇمكىندىكتەر جاساپ، نەگىزگى سەرىكتەستەرمەن ساۋدا بايلانىستارىن نىعايتادى. بۇل ستراتەگيالىق ماڭىزدى نىسان قىرعىزستاننىڭ كولىك ينفراقۇرىلىمىن دامىتۋ جانە جاھاندىق ەكونوميكاعا ينتەگراتسيالاۋ جولىنداعى پراگماتيكالىق ءتاسىلدىڭ سيمۆولى بولماق. سونىمەن قاتار، قىرعىزستاندى حالىقارالىق كولىك حابىنا اينالدىرۋ جولىنداعى تاعى ءبىر قادام بولىپ تابىلادى»، — دەپ مالىمدەدى جاپاروۆ.
قازىرگى ۋاقىتتا قىتايدان وزبەكستانعا تەمىرجول جۇكتەرىنىڭ نەگىزگى مارشرۋتى قازاقستان ارقىلى وتەدى. جۇكتەر قىتايدىڭ ءىرى قالالارىنان جونەلتىلىپ، قىتاي مەن قازاقستان شەكاراسىنداعى الاشانكوۋ – دوستىق نەمەسە حورگوس – التىنكول وتكىزۋ بەكەتتەرىنەن وتەدى. ودان ءارى قازاقستان اۋماعى ارقىلى الماتى، اقتوعاي نەمەسە تۇركىستان سياقتى نەگىزگى توراپتاردان ءوتىپ، قازاقستاننىڭ وڭتۇستىك وڭىرلەرى ارقىلى سارىاعاش – تاشكەنت سياقتى وتكەلدەرىمەن وزبەكستانعا جەتكىزىلەدى.
