Qazaqstan Prezidentı Qasym-Jomart Toqaev senbı künı Täjıkstan Prezidentı Emomali Rahmonmen kelıssöz jürgızdı, dep habarlaidy “Adyrna”.
Kezdesu barysynda ekı el arasyndaǧy sauda-ekonomikalyq jäne mädeni-gumanitarlyq bailanystardy damytu mäselelerı talqylandy.
Memleket basşysy Täjıkstan prezidentınıŋ sapary ekı el arasyndaǧy erekşe qūrmet pen şynaiy dostyqtyŋ belgısı ekenın atap öttı.
Qasym-Jomart Toqaev Qazaqstan men Täjıkstannyŋ strategiialyq ärıptestık jäne odaqtastyq qatynastary joǧary deŋgeide damyp kele jatqanyn aitty. Sondai-aq ekıjaqty sauda ainalymynyŋ jyl saiyn 1 milliard dollardan asatynyn jetkızdı. Qazaqstan Täjıkstannyŋ ırı üş sauda serıktesınıŋ qatarynda.
Kezdesude mädeni-gumanitarlyq bailanystarǧa da nazar audaryldy. Atap aitqanda, ekı elde mädeniet künderı ötkızılıp, körnektı tūlǧalarǧa arnalǧan eskertkışter aşylǧan. Duşanbe qalasynda Abaidyŋ biustı, al Astanada İbn Sina eskertkışı ornatylǧan.
Öz kezegınde Emomali Rahmon Qazaqstannyŋ Täjıkstannyŋ jetekşı sauda-ekonomikalyq serıktesterınıŋ bırı ekenın atap öttı. Onyŋ aituynşa, biylǧy toǧyz aida ekı el arasyndaǧy tauar ainalymy 1 milliard dollardan asyp, ötken jyldyŋ säikes kezeŋımen salystyrǧanda 26 paiyzǧa juyq ösken.
Qazır Täjıkstanda qazaqstandyq kapitaldyŋ qatysuymen 130-dan astam käsıporyn tırkelgen. Al Qazaqstanda täjık tarapynyŋ qatysuymen 580-nen astam käsıporyn jūmys ısteidı.
Kelıssözder barysynda kölık jäne logistika, energetika, auyl şaruaşylyǧy, su resurstary, önerkäsıp jäne sifrlandyru salalaryndaǧy yntymaqtastyqty keŋeitu mäselelerı de qaraldy.
Sondai-aq taraptar joǧary deŋgeide qol jetkızılgen kelısımderdı jüielı türde jüzege asyrudyŋ maŋyzyn atap öttı.
