قاسىم-جومارت توقاەۆ پەن الەكساندر ۆۋچيچ كەلىسسوزدەردەن كەيىن بىرلەسكەن بريفينگ وتكىزدى، دەپ حابارلايدى "ادىرنا" ۇلتتىق پورتالى.
مەملەكەت باسشىسى سەربيا پرەزيدەنتىنىڭ رەسمي ساپارى ەكى ەل اراسىنداعى ديپلوماتيالىق قاتىناستاردىڭ 30 جىلدىعىمەن تۇسپا-تۇس كەلگەنىن اتاپ ءوتتى. توقاەۆ سەربيانى قازاقستاننىڭ بالقان تۇبەگىندەگى ماڭىزدى ءارى سەنىمدى سەرىكتەسى رەتىندە باعالاپ، ەكىجاقتى بايلانىستاردىڭ بارلىق باعىتتا دامىپ كەلە جاتقانىن ايتتى.
پرەزيدەنتتىڭ ايتۋىنشا، وسى ۋاقىت ىشىندە ەلدەر اراسىندا سەنىمدى ساياسي ديالوگ قالىپتاسىپ، ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق ىنتىماقتاستىق نىعايعان. قازاقستاندا بۇگىندە 60-قا جۋىق سەرب كومپانياسى تابىستى جۇمىس ىستەپ جاتىر.
جوعارى دەڭگەيدەگى كەلىسسوزدەر بارىسىندا تاراپتار ساۋدا، كولىك-لوگيستيكا، ەنەرگەتيكا، ونەركاسىپ، اۋىل شارۋاشىلىعى، اقپاراتتىق تەحنولوگيالار جانە جاساندى ينتەللەكت سالالارىنداعى ىنتىماقتاستىقتى كەڭەيتۋگە ۋاعدالاستى. سونداي-اق ينۆەستيتسيالىق جوبالاردى دامىتۋ جانە ساۋدا كولەمىن ارتتىرۋ ماسەلەسىنە ەرەكشە نازار اۋدارىلدى.
اۋىل شارۋاشىلىعى سالاسىندا دا ناقتى قادامدار قاراستىرىلدى. سەربيالىق كومپانيانىڭ قازاقستاندا مۇزداتىلعان ونىمدەر شىعاراتىن زاۋىت سالۋ جوسپارى ەكى ەل اراسىنداعى اگرارلىق سەرىكتەستىكتى جاڭا دەڭگەيگە كوتەرۋى مۇمكىن.
تاراپتار بەيبىت اتوم ەنەرگەتيكاسى، تسيفرلىق تەحنولوگيالار مەن جاساندى ينتەللەكت باعىتىندا تاجىريبە الماسۋعا دايىن ەكەندەرىن جەتكىزدى. سونىمەن قاتار مادەنيەت، ءبىلىم بەرۋ جانە تۋريزم سالالارىنداعى بايلانىستاردى نىعايتۋعا كەلىسىم جاسالدى.
كەلىسسوزدەر قورىتىندىسى بويىنشا بىرلەسكەن مالىمدەمە قابىلدانىپ، بىرقاتار ماڭىزدى قۇجاتتارعا قول قويىلدى.
پرەزيدەنتتەر حالىقارالىق جانە وڭىرلىك ماسەلەلەردى دە تالقىلاپ، جاھاندىق تۇراقسىزدىق جاعدايىندا جانجالداردى ديپلوماتيالىق جولمەن شەشۋدىڭ ماڭىزىن اتاپ ءوتتى. ولار بىرىككەن ۇلتتار ۇيىمى جارعىسىن جانە حالىقارالىق قۇقىق نورمالارىن ساقتاۋ قاجەتتىگىن ايتتى.
ءوز كەزەگىندە الەكساندر ۆۋچيچ قازاقستاننىڭ ەكونوميكالىق دامۋىنا جانە كوپۆەكتورلى سىرتقى ساياساتىنا جوعارى باعا بەرىپ، ەكى ەل اراسىنداعى ىنتىماقتاستىقتىڭ الەۋەتى زور ەكەنىن جەتكىزدى. ول سونداي-اق قاۋىپسىزدىك سالاسىنداعى تاجىريبە الماسۋعا قىزىعۋشىلىق ءبىلدىردى.
