زاڭدى قۇرمەتتەۋ، قۇقىقتىق مادەنيەت پەن جەكە جاۋاپكەرشىلىك بالا كەزدەن قالىپتاسادى. شىعىس قازاقستان وبلىسىندا باستاۋ العان PVE LABS جوباسى جاسوسپىرىمدەردى ومىرلىك كۇردەلى جاعدايلاردا دۇرىس شەشىم قابىلداۋعا، تەرىس ىقپالدارعا قارسى تۇرۋعا جانە ءوز ارەكەتتەرىنە جاۋاپكەرشىلىكپەن قاراۋعا ۇيرەتەدى. جوبا اياسىندا كەمىندە 220 وقۋشىنى قامتۋ جوسپارلانىپ وتىر.
باستاما «زاڭ مەن ءتارتىپ» يدەولوگەماسى اياسىندا جۇزەگە اسىرىلىپ، جاسوسپىرىمدەردىڭ قۇقىقتىق ساۋاتتىلىعىن ارتتىرۋعا، قۇقىق بۇزۋشىلىقتار مەن زورلىق-زومبىلىقتىڭ الدىن الۋعا باعىتتالعان.
جوبانىڭ ەرەكشەلىگى – وقىتۋ ۇدەرىسىنىڭ تاجىريبەگە نەگىزدەلۋى. ءداستۇرلى دارىستەردىڭ ورنىنا وقۋشىلارعا قۇرداستارىنىڭ قىسىمى، الەۋمەتتىك جەلىلەردەگى قاۋىپتى ۇسىنىستار مەن جانجالدار سياقتى كۇندەلىكتى ومىردە كەزدەسەتىن جاعدايلاردى تالداۋ ۇسىنىلادى. وسى ارقىلى ولار ءوز ارەكەتتەرىنىڭ سالدارىن باعالاپ، ماسەلەلەردى زاڭ اياسىندا شەشۋ جولدارىن ۇيرەنەدى.
جوبا ورتالىق ازياداعى زورلىق-زومبىلىق ەكسترەميزمىنىڭ الدىن الۋعا باعىتتالعان PREVECA II حالىقارالىق باعدارلاماسى اياسىندا گەرمانيا حالىقارالىق ىنتىماقتاستىق قوعامىمەن (GIZ) جانە قازاقستان رەسپۋبليكاسى ىشكى ىستەر مينيسترلىگىمەن ارىپتەستىكتە جۇزەگە اسىرىلۋدا.
قور ديرەكتورى ولگا سۆيريدەنكونىڭ ايتۋىنشا، العاشقى قۇقىقتىق لاگەر وسكەمەن قالاسىندا جۇمىسىن باستادى. الداعى ۋاقىتتا وسىنداي لاگەرلەر گلۋبوكوە اۋدانىنداعى بەلوۋسوۆكا كەنتىندە، ريددەر قالاسىندا جانە التاي اۋدانىندا ۇيىمداستىرىلادى. جالپى، ءتورت اۋماقتا كەمىندە 220 وقۋشىنى قامتۋ كوزدەلگەن.
ء«بىز بالالارعا زاڭنىڭ تەك جازالاۋ ءۇشىن ەمەس، ەڭ الدىمەن قاۋىپسىزدىكتى قامتاماسىز ەتۋ ءۇشىن قاجەت ەكەنىن تۇسىندىرگىمىز كەلەدى. سوندىقتان قۇقىقتىق لاگەرلەردە ءداستۇرلى دارىستەر مەن سەمينارلار وتكىزىلمەيدى. پوليتسيا جانە پروكۋراتۋرا وكىلدەرىمەن بىرلەسىپ، جاسوسپىرىمدەر كۇندەلىكتى ومىردە تاپ بولۋى مۇمكىن ناقتى جاعدايلاردى تالداپ، ولاردىڭ الدىن الۋ جولدارىن قاراستىرامىز»، – دەدى ولگا بوريسوۆنا.
وقىتۋعا پوليتسيا جانە پروكۋراتۋرا قىزمەتكەرلەرى، پسيحولوگتار، مەدياساۋاتتىلىق پەن زورلىق-زومبىلىق ەكسترەميزمىنىڭ الدىن الۋ سالاسىنداعى ماماندار، سونداي-اق الماتى قالاسىنداعى ىشكى ىستەر مينيسترلىگى اكادەمياسىنىڭ وكىلدەرى قاتىسادى.
باعدارلاما سىني ويلاۋ، قۇقىقتىق جانە مەدياساۋاتتىلىق، جانجالداردى شەشۋ جانە ەكسترەميستىك كورىنىستەردىڭ الدىن الۋ باعىتتارىن قامتيدى.
سونىمەن قاتار وقۋشىلاردىڭ ءوز باستامالارىنا قولداۋ كورسەتىلەدى. قاتىسۋشىلار ۇسىنعان ۇزدىك جوبالار ىرىكتەلىپ، ولاردى جۇزەگە اسىرۋعا مۇمكىندىك بەرىلەدى. بۇل جاسوسپىرىمدەردىڭ قۇقىقتىق بىلىمدەرىن مەكتەپ ومىرىندەگى ناقتى ماسەلەلەردى شەشۋدە قولدانۋىنا جول اشادى.
PVE LABS جوباسىنىڭ نەگىزگى ناتيجەسى – تەك قاتىسۋشىلار سانىمەن ەمەس، ولاردىڭ بويىندا زاڭدى قۇرمەتتەۋ، قاۋىپسىز مىنەز-قۇلىق جانە ازاماتتىق جاۋاپكەرشىلىك مادەنيەتىنىڭ قالىپتاسۋىمەن ولشەنبەك.
وسىلايشا، جوبا «زاڭ مەن ءتارتىپ» قاعيداتتارىن مەكتەپ ورتاسىندا نىعايتۋعا جانە ءوز قۇقىقتارى مەن مىندەتتەرىن بىلەتىن، وزگەلەردىڭ قۇقىعىن قۇرمەتتەيتىن جاۋاپتى ۇرپاق تاربيەلەۋگە باعىتتالعان.
