شىعىس قازاقستان وبلىسىنىڭ سامار اۋىلىندا ەر ادام بۇرىنعى جۇبايىنا پىشاقپەن شابۋىل جاساپ، اۋىر جاراقات سالدى. سالدارىنان التى بالانىڭ اناسى قۇلاعىنىڭ ءبىر بولىگىنەن ايىرىلىپ، اۋرۋحاناعا جەتكىزىلدى. بۇل تۋرالى كريمينالنىي كازاحستان Telegram ارناسى جازدى، دەپ حابارلايدى "ادىرنا".
جابىرلەنۋشىنىڭ ايتۋىنشا، وقيعا ونىڭ جۇمىس ورنىنداعى ءۇزىلىس كەزىندە بولعان. بۇرىنعى كۇيەۋى كۇتپەگەن جەردەن پىشاقپەن شابۋىل جاساپ، دەنەسىنە اۋىر جاراقات كەلتىرگەن.
ايەلدىڭ سوزىنشە، ەكس-كۇيەۋى بۇعان دەيىن دە ءوزىن بىرنەشە رەت قورقىتىپ، قىسىم كورسەتكەن. وسىعان بايلانىستى ول پوليتسياعا بىرنەشە مارتە ارىزدانعانىن ايتادى. سونداي-اق شابۋىلعا دەيىن الەۋمەتتىك جەلىلەردە بەينەۇندەۋ جاريالاپ، ءوزىنىڭ جانە كامەلەتكە تولماعان التى بالاسىنىڭ ومىرىنە قاۋىپ ءتونىپ تۇرعانىن ايتىپ، قۇزىرلى ورگانداردان كومەك سۇراعان.
وقيعادان كەيىن جابىرلەنۋشى پوليتسيانىڭ دەر كەزىندە ارەكەت ەتپەۋى قايعىلى جاعدايعا اكەلە جازداعانىن مالىمدەدى.
شىعىس قازاقستان وبلىسى پوليتسيا دەپارتامەنتىنىڭ مالىمەتىنشە، 25 شىلدە كۇنى سامار اۋىلىندا ايەلدىڭ پىشاق جاراقاتىن العانى تۋرالى حابارلاما تۇسكەن. كۇدىكتىنى ۇستاۋ ءۇشىن جەدەل ىزدەستىرۋ شارالارى جۇرگىزىلىپ، سول كۇنى 51 جاستاعى بۇرىنعى كۇيەۋى قولعا تۇسكەن.
قازىرگى ۋاقىتتا كۇدىكتى قاماۋعا الىنىپ، وعان قاتىستى قىلمىستىق ءىس قوزعالدى. سونىمەن قاتار وعان جابىرلەنۋشىمەن قانداي دا ءبىر بايلانىس جاساۋعا تىيىم سالاتىن قورعاۋ نۇسقاماسى شىعارىلدى.
پوليتسيانىڭ حابارلاۋىنشا، بۇعان دەيىن ايەلدىڭ ارىزدارى بويىنشا كۇدىكتى بىرنەشە رەت قىلمىستىق جانە اكىمشىلىك جاۋاپكەرشىلىككە تارتىلعان. سونداي-اق ول اتا-انا قۇقىعىنان ايىرىلعان.
ۆەدومستۆو قازىرگى ۋاقىتتا ءىس بويىنشا بارلىق قاجەتتى تەرگەۋ امالدارى جۇرگىزىلىپ جاتقانىن، ال تەرگەۋ بارىسى وبلىستىق پوليتسيا دەپارتامەنتى باسشىلىعىنىڭ ەرەكشە باقىلاۋىندا ەكەنىن مالىمدەدى.
