شىعىس قازاقستان وبلىسى كاتونقاراعاي اۋدانىنىڭ ءورت ءسوندىرۋ قىزمەتىندەگى تەحنيكالاردىڭ توزىعى جەتكەنءى ايتىلدى. بۇل تۋرالى «ادىرنا» ۇلتتىق پورتالىنا شقو تۇرعىندارى، بۇرىنعى ءورت ءسوندىرۋ قىزمەتكەرلەرى ايتىپ ۆيدەو جولدادى. ال وبلىستىق توتەنشە جاعدايلار دەپارتامەنتى ءتيىستى ءورت ءسوندىرۋ بولىمىندە ءورت ءسوندىرۋ تەحنيكاسىنىڭ جاڭاسىنا - 1 جىل، ەسكىسىنە 35 جىل بولعانىن ءمالىم ەتتى.
بۇرىنعى ءورت سوندىرۋشىلەردىڭ ايتۋىنشا ءورت ءسوندىرۋ تەحنيكالارىنىڭ بارلىعى ەسكى. ءتىپتى، قىزمەتكەرلەردىڭ ءوزى كولىككە قاجەت قۇرىلعىلاردى ءوز قالتالارىنان قاراجات شىعارىپ، ساتىپ الادى ەكەن.
№37 ءورت ءسوندىرۋ ءبولىمىنىڭ بۇرىنعى قىزمەتكەرى ازات موجانوۆ پەن №14 ءورت ءسوندىرۋ ءبولىمىنىڭ بۇرىنعى باسشىسى باحىتبەك شىلاي شىعىس قازاقستان وبلىسى قاتونقاراعاي اۋدانىنىڭ ءورت ءسوندىرۋ قىزمەتىنىڭ جاعدايى مۇشكىل ەكەنىن ايتادى.
«ءوز اقشامىزعا اۆتوتسيستەرنا ساتىپ الدىق»
- 2011 جىلى كاتونقاراعاي اۋىلىنداعى №37 ءورت ءسوندىرۋ بولىمىنە جۇمىسقا ورنالاستىم. ءورت ءسوندىرۋ بولىمىندە 10 جىل ءورت ءسوندىرۋ كولىگىنىڭ جۇرگىزۋشىسى رەتىندە قىزمەت اتقاردىم. وسى ون جىلدا نەبىر قيىندىقتار كوردىم. مەن وسى ءورت ءسوندىرۋشى قىزمەتىن تاڭداعانىما ەش وكىنبەيمىن. الايدا، سوڭعى جىلدارى وسى سالاعا مۇلدەم كوڭىل اۋدارىلماي، ادىلەتسىزدىك پەن جەمقورلىقتىڭ قۇربانى بولعانداي بولىپ كورىندى. وسى ورايدا مەن جاي وتىرا المادىم. ءوزىمنىڭ ءورت ءسوندىرۋ ءبولىمىمنىڭ ماتەريالدى-تەحنيكالىق جاعدايى جۇرەگىمە قاتتى باتتى. مۇنداعى ءورت ءسوندىرۋ بولىمىندەگى كولىكتەر 1977 جىلى شىققان. تەحنيكانىڭ جاعدايى وتە ناشار. ونىڭ توزىعىنىڭ جەتكەنى سونشالىقتى ورتكە شىققاندا كەيدە اۆتوكولىكتەردىڭ بەنزوناسوسى وزدىگىنەن جۇمىس ىستەمەي، قولمەن جۇمىس ىستەتىپ وتىرعان كەزدەر بولدى. ءتىپتى، ءورت ءسوندىرىپ تۇرىپ اۆتوكولىك ءوشىپ قالاتىنداي جاعداي بولعان. سول سەبەپتىكاتونقاراعاي اۋدانى اقسۋ اۋىلىنان ۇجىم بولىپ ءوز اقشامىزعا اۆتوتسيستەرنا ساتىپ الىپ جۇردىك، - دەيدى ازات موجانوۆ.
سونداي-اق، ول اۆتاكولىكتىڭ بولشەكتەرىن الۋ ءۇشىن قارىزعا دا كىرەتىندەرىن ايتتى. ايتۋىنشا، اۋىلداعى اۆتوبولشەك دۇكەندەرىندە ارنايى قارىز داپتەرلەرى دە بار ەكەن.
- ءورت ءسوندىرۋ كولىكتەرىنىڭ ەسكىلىگى سونشالىقتى – كەيدە ورتكە جەتە الماي جەكە كولىكتەرىمىزبەن سۇيرەپ اكەلگەن كەزدەر دە بولعان. كولىكتەر وزدىگىنەن سۋ دا سورا المايدى. تەحنيكالاردان بولەك، ءوزىمىزدىڭ ۇستىمىزگە كيەتىن فورمالاردى بازار ارالاپ ءوزىمىز ساتىپ الىپ جۇردىك. بۇنىڭ بارلىعىن بىرەۋدەن قورىققانان نەمەسە باسشىلارعا جاعىنۋ ءۇشىن ىستەگەن ەمەسپىز. باسشىلارعا ءبىز كەرەك ەمەس بولساق تا، ءبىز حالىققا كەرەكپىز، ەل بىزگە سەنەدى دەگەن سەنىممەن جاسادىق. جاي ءۇي، قورا-قوپسىنى قويىپ، الدا-جالدا الەۋمەتتىك ماڭىزى بار وبەكتىلەردە، ياعني مەكتەپ، بالا-باقشا نەمەسە اۋرۋحانادا ءورت بولسا، ءبىزدىڭ مىنا تەحنيكالىق جاعدايىمىزبەن ءورتتى وشىرمەك تۇگىل، جەتە الامىز با دەگەن كۇمانمەن ءجۇرمىز، - دەيدى ازات موجانوۆ.
ونىڭ ايتۋىنشا، وسى جاعدايدىڭ بارلىعىن باسشىلىقبىلەدى. «بۇنىڭ بارلىعىنا سۇرانىستار جىبەرىلىپ وتىرعان. بىراق ناتيجەسى ءالى كۇنگە دەيىن جوق. توقسان سايىن كەلىپ وتىراتىن كوميسسيالارعا دا بۇل جاعداي تۋرالى ايتىلىپ وتىراتىن. دەگەنمەن، ولاردىڭ دا اۋىزىن جابادى»، - دەدى ازات موجانوۆ.
«جۇمىستان شىعۋعا ارىز جازدىردى»
ازات موجانوۆ وسى ماسەلەلەردى ايتىپ، شاعىنعاننان كەيىن ونى جۇمىستان شىعارىپ، ءتىپتى ونىڭ ۇستىنەن ارىز جازعان كورىنەدى.
- مۇنداي جاعدايلار تۋرالى ۆيدەو، فوتوعادا ءتۇسىرىپ باسشىلىققا بىرنەشە مارتە جىبەرگەنمىن. وسىلاردان كەيىن،ماعان «رەپرەسسيا» باستالدى. ارتىما ءتۇسىپ، ارىپتەستەرىمدى ماعان قارسى قويۋعا ناسيحاتتاۋعا دەيىن باردى. مەن سوندا شقو توتەنشە جاعدايلار دەپارتامەنتىنىڭ ينستاگرامم الەۋمەتتىك جەلىسىندەگى رەسمي پاراقشاسىندا «تۇگەل جاڭا تەحنيكامەن قامتىلعان، ءبارى ساقاداي-ساي» دەگەن ۆيدەوسىنداعى وتىرىگىنە شىداماي، ناقتى فاكتىلەردى ايتىپ، پىكىر جازعان بولاتىنمىن. مەنىڭ جازباما بايلانىستى قىزمەتتىك تەكسەرۋ جۇرگىزىلدى. جەكە قۇراممەن بولعان سۇحباتتى بەينەجازباعا جازىپ وتىردى. مەن جانە باسقا دا بىرنەشە قىزمەتكەر ءورت ءسوندىرۋ ءبولىمىنىڭ جاعدايىن ايتتىق.وسىنداي شىندىقتار ايتىلعان كەزدە، كەلگەن كوميسسيا ۆيدەونى توقتاتىپ، ايتاتىن سوزدەردى وزدەرىنە كەرەگىندايىنداتىپ، قايتادان جالعاستىرىپ وتىردى. ال كەلگەن وسى تەكسەرۋمەن اينالىسقان كوميسسيا باسشىسى مەنى جەكە كىرگىزىپ، «جۇمىستان ءوز بەتىڭشە شىعىپ كەت، ايتپەسە كەيىن قيىن بولادى. ەش جەرگە جۇمىسقا تۇرا المايسىڭ. مەن بۇل ماسەلەلەردى ءوزىم شەشەمىن» دەدى. سوسىن مەننەن جۇمىستان شىعۋعا ارىز جازدىرىپ الدى. ياعني ماعان پسيحولوگيالىققىسىم جاسالدى. وزىمدە بار ۆيدەو، فوتو ماتەريالداردى سول كىسىگە بەردىم. الدانىپ قالعانىمدى كەيىن ءتۇسىندىم. الەۋمەتتىك جەلىگە جازعانىم ءۇشىن مەنى الداۋ ارەكەتىمەن 2021 جىلدىڭ 11 قاراشاسىنداعى №627 ج/ق بۇيرىعىمەن ادىلەتسىز جۇمىستان شىعارىپ جىبەردى، - دەيدى ازات موجانوۆ.
№14 ءورت ءسوندىرۋ ءبولىمىنىڭ باسشىسى بولعان باحىتبەك شىلاي دا ادىلەتسىزدىكتىڭ قۇربانى بولعانىن ايتادى. وعان جالا جاۋىپ، باسشىلىقتان الىپ تاستاعان. قازىر ريددەر قالاسىنىڭ №1 مەملەكەتتىك ءورت ءسوندىرۋ ءبولىمىنىڭ (1-ءموسب) اعا يجەنەرى قىزمەتىن اتقارادى.
- 2019-2021 جىلدار ارالىعاندى №14 ءورت ءسوندىرۋ ءبولىمىنىڭ باسشىسى بولدىم. 2021 جىلى ورمان جاندى. سول كەزدە ءتۇرلى قۇيتىرقى ارەكەتتەرمەن مەنى لاۋازىمىمنان ءتۇسىرىپ تاستادى.قازىرگى كەزدە ءورت ءسوندىرۋ تەحنيكاسىنىڭ جاعدايى ءماز ەمەس. مەن بىلەتىن ريددەر مەن كاتونقاراعايدىڭ ءورت ءسوندىرۋ بولىمدەرىندە تەحنيكانىڭ ءبارى ەسكى. قازىر مينيسترلىك وكىلدەرى «400-دەي تەحنيكا عانا ەسكى، قالعانىنىڭ بارلىعى جاڭا» دەپ ايتىپ جاتىر عوي. ونىڭ بارلىعى وتىرىك. ءتىپتى، ءبىزدىڭ بولىمدە 12 ءورت ءسوندىرۋشىبولسا، 20 ليتر سۋ قۇيىلاتىن، ارقاعا ءىلىپ الىپ، ءورتتى وشىرەتىن رلو تەك 2 قىزمەتكەردە عانا بار. بۇل – وتە سوراقى، ۇيات نارسە. سونى الىپ بەرە الماي وتىرعاندا، جاڭا كولىكتى قالاي كۇتەمىز؟ ءورت بولعان جاعدايدا تەحنيكاجەتىسپەگەندىكتەن، ءبىر-ءبىرىمىزدى كۇتىپ تۇرامىز. بۇل - تازا ولىمگە يتەرىپ جاتقان جاعداي! - دەيدى باحىتبەك شىلاي.
سونداي-اق، ول وبلىس ويىنشا ءورت ءسوندىرۋ بولىمدەرىندە بىردە-ءبىر درون جوق ەكەنىن ايتتى. ايتۋىنشا، درون ارقىلى قاي جەردە ءورت بولعانىن بىردەن ءبىلىپ، قىزمەتكەرلەردى سول جەرگە جۇمىلدىرۋعا بولار ەدى.
- 2018 جىلى ءورت ءسوندىرۋ ماشيناسى اۋدارىلىپ، ۆلاديمير ميحايلوۆيچ دەگەن قىزمەتكەر قايتىس بولدى. سول ماشينانىڭ ودان بۇرىن اقاۋى بولعان. ول كەزدە مەن №14 ءورت ءسوندىرۋ بولىمىندە ىستەيتىنمىن. وعان دەيىن جوعارى جاققا ماشينانىڭ اقاۋى بار، جوندەۋ قاجەت، كولىكتىڭ بولشەكتەرى كەرەك ەكەنىن تالاي رەت ايتتىق. الايدا، قۇلاق اسپادى. ءسويتىپ، ءبىر قىزمەتكەر قازا تاپتى، ءبىر قىزمەتكەر جازىقسىزدان-جازىقسىز ەكى جارىم جىلعا سوتتالىپ قايتتى. بۇل جاعدايدان ساباق العان ەشكىم جوق. ءالى كۇنگە دەيىن تەحنيكا جاقسارمادى، - دەپ ول ءسوزىن قورىتىندىلادى.
شىعىس قازاقستان وبلىسىنىڭ توتەنشە جاعدايلار دەپارتامەنتى “ادىرنانىڭ” وسى ماسەلە تۋرالى ساۋالىنا جاۋاپ بەردى.
دەپارتامەنتتىڭ ايتۋىنشا، قاتونقاراعايداعى №27 بولىمدەگى ءورت ءسوندىرۋ تەحنيكاسىنىڭ جاڭاسىنا - 1 جىل، ەسكىسىنە 35 جىل بولعان.
"بۇگىنگى تاڭدا شىعىس قازاقستان وبلىسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ تەڭگەرىمىندە 247 بىرلىك تەحنيكا بار، ونىڭ 125-ءى نەگىزگى، 40-ى ارنايى ماقساتتاعى، 82-ءى قوسالقى قۇرال-جابدىقتار" دەلىنگەن دەپارتامەنت جاۋابىندا.
وسى دەرەككە قاراعاندا، جىل سايىن تۇراقتى نەگىزدە توتەنشە جاعدايلار مينيسترلىگى مەن شىعىس قازاقستان وبلىسىنىڭ اكىمدىگى ءورت ءسوندىرۋ تەحنيكاسىن ساتىپ الادى. جاڭا ءورت ءسوندىرۋ كولىكتەرى كەلگەن كەزدە ولار ەڭ الدىمەن شەكارالاس ايماقتارعا، ورمان قورى بار ايماقتارعا، سونداي-اق ءورت وقيعاسى ءجيى تىركەلگەن بولىمشەلەرگە تاراتىلادى.
شىعىس قازاقستان وبلىستىق دەپارتامەنتىنىڭ "ادىرناعا" جاۋابىنا قاراعاندا، كاتونقاراعايداعى №27 ءورت ءسوندىرۋ بولىمىندە ءورت سوندىرۋگە ارنالعان 4 تەحنيكا بار. تەحنيكالار مىنالار: 2022 جىلى شىققان كاماز، 2007 جىلى شىققان ۋرال، 1988 جىلى شىققان گاز-66, 1977 جىلى شىققان زيل 131.
"تەحنيكالار شىعارىلعان جىلىنا قاراماستان، تەحنيكالىق جارامدى كۇيدە ۇستالۋدا. سونىڭ ناتيجەسىندە بۇگىنگى تاڭدا وبلىستا وتكەن جىلمەن سالىستىرعاندا ءورتتىڭ 10 پايىزعا تومەندەۋى تىركەلدى" دەلىنگەن دەپارتامەنت جاۋابىندا.
شىعىس قازاقستان وبلىسىمەن شەكتەسەتىن اباي وبلىسىندا 8 ماۋسىمدا "سەمەي ورمانى" مەملەكەتتىك ورمان تابيعي رەزەرۆاتىندا باستالعان الاپات ءورت 14 ماۋسىمدا وقشاۋلاندى. وقيعا سالدارىنان 15 ادام قازا تاپتى. ءورت سەمەي قالاسىنان 25 شاقىرىم قاشىقتىقتا بولعان. 9 ماۋسىمدا اباي وبلىسىنىڭ ورمان القابىنداعى ءورت فاكتىسى بويىنشا قىلمىستىق كودەكستىڭ "ەكى جانە ودان دا كوپ ادامنىڭ ابايسىزدا ولىمىنە اكەپ سوققان ءورت قاۋىپسىزدىگى تالاپتارىن بۇزۋ" بابى بويىنشا ءىس قوزعالدى. ءورت كەزىندە قىزمەتتەن الىنعان توتەنشە جاعدايلار ءمينيسترى يۋري يلين قىزمەتتىك مىندەتتەرىن ورىنداماۋ جانە نەمقۇرايلىلىق تۇرعىسىنان تەكسەرىلىپ جاتىر. ءىس ارنايى پروكۋرورلاردىڭ قاراۋىندا.
ال 18 ماۋسىم كۇنى شىعىس قازاقستان وبلىسى كاتونقاراعاي ۇلتتىق تابيعي ساياباعىندا دا ءورت شىققان. كاتونقاراعاي اۋدانىنىڭ سەننوە اۋىلىنان 3 شاقىرىم جەردە الدىن الا اۋماعى 15 گەكتار قۇرعاق ءشوپ پەن بۇتالار ورتەنگەن. ءورت سوندىرۋگە توتەنشە جاعدايلار دەپارتامەنتى ورمان شارۋاشىلىعىنان 99 ادام جانە 3 تەحنيكا، «اۆياورمانكۇزەتىنەن» 6 ادام جانە جەرگىلىكتى اتقارۋشى ورگاننان 7 ادام جۇمىلدىرىلدى.
