تاشكەنتتە تانىمال قازاقستاندىق ءانشى Jah Khalib-ءتىڭ كونتسەرتى وتكەن «حۋمو ارەنا» كەشەنىنىڭ جانىندا حالىق توبەلەسىپ، تارتىپسىزدىكتەر ورىن الدى، دەپ حابارلايدى “ادىرنا” ۇلتتىق پورتالى
ۇلتتىق ۇلاننىڭ حابارلاۋىنشا، مىڭنان استام ازامات بۇرىن كورسەتىلگەن بيلەتتى قايتا كورسەتكەندىكتەن كونتسەرتكە كىرە الماعان. قازىر تەرگەۋ امالدارى جۇرگىزىلۋدە.
25 قاراشادا تاشكەنتتەگى Humo Arena كەشەنىندە قازاقستاندىق ءانشى دجاح ءحاليبتىڭ كونتسەرتى باستالماس بۇرىن فان-زوناعا كىرە بەرىستە توبەلەس بولدى. الەۋمەتتىك جەلىدە مىڭداعان ادامنىڭ جينالعان ۆيدەوسى تاراپ كەتتى. تاعى ءبىر بەينەجازبادا وزبەكستان ۇلتتىق گۆاردياسىنىڭ قىزمەتكەرلەرى كەلۋشىلەردىڭ ءبىرىن الىپ بارا جاتقانى كورىنەدى.
ۇلتتىق ۇلاننىڭ تاشكەنت قالالىق دەپارتامەنتىنىڭ مالىمەتىنشە، زالعا كىرە بەرىستە تارتىپسىزدىكتەر ورىن العان.
«وسىندا قىزمەت ەتەتىن ۇلتتىق ۇلان قىزمەتكەرلەرىمەن قوعامدىق ءتارتىپتى بۇزدى دەگەن كۇدىكتى ازاماتتار وقيعا ورنىنان قاۋىپسىز ايماققا شىعارىلىپ، بولۋى مۇمكىن كەلەڭسىز جاعدايلاردىڭ الدىن الدى. تارتىپسىزدىككە قاتىستى تەرگەۋ جانە زەرتتەۋ جۇرگىزىلۋدە... ەشكىم زارداپ شەككەن جوق»، - دەلىنگەن ۆەدومستۆونىڭ 26 قاراشاعا قاراعان ءتۇنى جاريالانعان العاشقى حابارلاماسىندا.
كەيىن ۇلتتىق ۇلان دەپارتامەنتى ازاماتتاردىڭ كونتسەرتكە 10 مىڭنان استام ەلەكتروندى بيلەت ساتىپ العانىن حابارلادى. بيلەتتەردى ساتاتىن «iTicket» سايتىنىڭ قىزمەتكەرلەرى ارنايى سكانەر QR كودى ارقىلى كەلۋشىلەردىڭ بيلەتتەرىن تەكسەردى.
«كونتسەرت زالىنداعى ورىنداردىڭ بارلىعىن الىپ قويعانىمەن، مىڭنان استام ازامات سىرتتا قالىپ، كەپتەلىس جاساپ، كىرۋگە ارەكەتتەندى. كىرە بەرىستە ەلەكتروندى بيلەتتەردى قايتا-قايتا كورسەتۋ فاكتىلەرى انىقتالعان. ارينە، مۇنداي بيلەتى بار ازاماتتاردى وتكىزۋگە بولمايدى»، - دەلىنگەن حابارلامادا
ۆەدومستۆو بۇل ازاماتتار ۇسىنعان ەلەكتروندى بيلەتتەردى تانىستارىنان نەمەسە باسقا ادامداردان سىيلىق رەتىندە جانە ساتىپ العانىن ايتتى. ىشكى ىستەر دەپارتامەنتىنىڭ قىزمەتكەرلەرى كەيبىر ازاماتتاردىڭ جەكە باس پايداسى ءۇشىن ءبىر ەلەكتروندى بيلەتتەردى بىرنەشە رەت ساتقانىن انىقتادى.
قازىر تەرگەۋ امالدارى جۇرگىزىلۋدە. مۇنداي زاڭسىز ارەكەتتەرگە بارعاندارعا زاڭ بويىنشا شارا قولدانىلاتىن بولادى، دەپ حابارلادى ۇلتتىق ۇلان دەپارتامەنتى.
«مۇنداي جاعدايلاردى تەك كونتسەرتتىك باعدارلامالاردا عانا ەمەس، فۋتبول ماتچتارىنا ەلەكتروندى بيلەتتەردى ساتۋ كەزىندە دە بايقاۋعا بولادى. قۇرمەتتى وتانداستار، سىزدەن جانە جاقىندارىڭىزدان ەلەكتروندى بيلەتتەردى تەك رەسمي سايتتار مەن ارنايى بيلەت ساتۋ ورىندارىنان ساتىپ الۋلارىڭىزدى سۇرايمىز»، - دەپ اتاپ ءوتتى قۇقىق قورعاۋ ورگانى.
