استانادا ەلىمىزدىڭ بارلىق وڭىرىنەن جينالعان اۋىل بالالارى قاتىساتىن AUYL SPORT رەسپۋبليكالىق ءتۋرنيرىنىڭ ءۇشىنشى ماۋسىمى وتەدى. 3–7 قاراشا ارالىعىندا ۇيىمداستىرىلاتىن جارىسقا سپورتتىڭ سەگىز تۇرىنەن ىرىكتەلگەن 2 مىڭعا جۋىق ءجاسوسپىرىم قاتىسادى.
بيىلعى ىرىكتەۋ كەزەڭىنە ەلىمىزدىڭ 17 وڭىرىندەگى 900-دەن استام اۋىلدان 12 مىڭنان استام بالا قاتىستى. ناتيجەسىندە ۇزدىك دەپ تانىلعان جاس سپورتشىلار رەسپۋبليكالىق كەزەڭگە جولداما الدى. ولار ەركىن كۇرەس، شاحمات، ۆولەيبول، ۇستەل تەننيسى، باسكەتبول، شاعىن فۋتبول، كاراتە WKF جانە بوكس بويىنشا باق سىنايدى.
تيمۋر قۇلىباەۆتىڭ Halyk قايىرىمدىلىق قورى جۇزەگە اسىراتىن AUYL SPORT جوباسى اۋىل بالالارىنىڭ سپورتقا قىزىعۋشىلىعىن ارتتىرۋعا، قابىلەتتەرىن شىڭداۋعا جانە ۇلكەن جارىستارعا قاتىسۋىنا مۇمكىندىك بەرۋدى كوزدەيدى.
جوبانىڭ ماقساتى مەن جۇزەگە اسىرىلۋ بارىسى تۋرالى تيمۋر قۇلىباەۆتىڭ Halyk قايىرىمدىلىق قورىنىڭ اتقارۋشى ديرەكتورى عالىمبەك جاقسىلىقوۆ پەن قر وقۋ-اعارتۋ مينيسترلىگىنىڭ «ۇلتتىق عىلىمي-پراكتيكالىق دەنە تاربيەسى ورتالىعى» رمقك باس ديرەكتورىنىڭ مىندەتىن اتقارۋشى ناتاليا الەكساندروۆنا درەيت ءسوز سويلەدى. ولار اۋىل سپورتىن دامىتۋ، جاسوسپىرىمدەردىڭ سپورتتىق الەۋەتىن قولداۋ جانە وڭىرلەردە بۇقارالىق سپورتتى وركەندەتۋ باعىتىنداعى جۇمىستارعا توقتالدى.
جوبانىڭ بيىلعى باستى جاڭالىقتارىنىڭ ءبىرى – رەسپۋبليكالىق تۋرنير قورىتىندىسى بويىنشا جوعارى ناتيجە كورسەتكەن جەڭىمپاز اۋىلداردا 10 جاڭا سپورت نىسانىن سالۋ باستاماسى. ولاردىڭ قۇرىلىسى مەن قاجەتتى جابدىقتارىن Halyk قورى تولىق قارجىلاندىرادى. ال جەرگىلىكتى اكىمدىكتەر سپورت نىساندارى ءۇشىن جەر تەلىمىن ءبولىپ، سۋ، جارىق جانە جىلۋ سياقتى قاجەتتى ينفراقۇرىلىمدى قامتاماسىز ەتەدى.
دايىن سپورت كەشەندەرى اكىمدىكتەردىڭ نەمەسە مەكتەپتەردىڭ بالانسىنا بەرىلەدى. جاڭا نىسانداردا اۋىل بالالارىنىڭ جاتتىعۋى تەگىن ۇيىمداستىرىلادى. بۇل باستاما شالعاي ەلدى مەكەندەردەگى سپورت ينفراقۇرىلىمىن دامىتۋعا جانە بالالاردىڭ تۇراقتى تۇردە سپورتپەن اينالىسۋىنا جاعداي جاساۋعا باعىتتالعان.
AUYL SPORT جوباسىنىڭ قاتىسۋشىلارى حالىقارالىق جارىستاردا دا ەل نامىسىن قورعاپ ءجۇر. 2025–2026 جىلدارى اۋىل سپورتشىلارى سەربيا، تۇركيا، وزبەكستان، گرەكيا، قىرعىزستان جانە باسقا دا مەملەكەتتەردە وتكەن 10 حالىقارالىق جارىسقا قاتىسىپ، التىن، كۇمىس جانە قولا جۇلدەلەرگە يە بولدى.
ايتا كەتەيىك، AUYL SPORT رەسپۋبليكالىق ءتۋرنيرى 3–7 قاراشا ارالىعىندا وتەدى. جارىستىڭ سالتاناتتى اشىلۋ ءراسىمى 6 قاراشا كۇنى ساعات 12:00-دە ۇيىمداستىرىلادى. ءتۋرنيردىڭ تولىق كەستەسىن، تىكەلەي ەفيرلەرىن جانە ناتيجەلەرىن ۇيىمداستىرۋشىلاردىڭ رەسمي سايتىنان — halyksport.kz جانە auylsport پلاتفورمالارىنان بىلۋگە بولادى.
