Astanada elımızdıŋ barlyq öŋırınen jinalǧan auyl balalary qatysatyn AUYL SPORT respublikalyq turnirınıŋ üşınşı mausymy ötedı. 3–7 qaraşa aralyǧynda ūiymdastyrylatyn jarysqa sporttyŋ segız türınen ırıktelgen 2 myŋǧa juyq jasöspırım qatysady.
Biylǧy ırıkteu kezeŋıne elımızdıŋ 17 öŋırındegı 900-den astam auyldan 12 myŋnan astam bala qatysty. Nätijesınde üzdık dep tanylǧan jas sportşylar respublikalyq kezeŋge joldama aldy. Olar erkın küres, şahmat, voleibol, üstel tennisı, basketbol, şaǧyn futbol, karate WKF jäne boks boiynşa baq synaidy.
Timur Qūlybaevtyŋ Halyk qaiyrymdylyq qory jüzege asyratyn AUYL SPORT jobasy auyl balalarynyŋ sportqa qyzyǧuşylyǧyn arttyruǧa, qabıletterın şyŋdauǧa jäne ülken jarystarǧa qatysuyna mümkındık berudı közdeidı.
Jobanyŋ maqsaty men jüzege asyrylu barysy turaly Timur Qūlybaevtyŋ Halyk qaiyrymdylyq qorynyŋ atqaruşy direktory Ǧalymbek Jaqsylyqov pen QR Oqu-aǧartu ministrlıgınıŋ «Ūlttyq ǧylymi-praktikalyq dene tärbiesı ortalyǧy» RMQK bas direktorynyŋ mındetın atqaruşy Natalia Aleksandrovna Dreit söz söiledı. Olar auyl sportyn damytu, jasöspırımderdıŋ sporttyq äleuetın qoldau jäne öŋırlerde būqaralyq sportty örkendetu baǧytyndaǧy jūmystarǧa toqtaldy.
Jobanyŋ biylǧy basty jaŋalyqtarynyŋ bırı – respublikalyq turnir qorytyndysy boiynşa joǧary nätije körsetken jeŋımpaz auyldarda 10 jaŋa sport nysanyn salu bastamasy. Olardyŋ qūrylysy men qajettı jabdyqtaryn Halyk qory tolyq qarjylandyrady. Al jergılıktı äkımdıkter sport nysandary üşın jer telımın bölıp, su, jaryq jäne jylu siiaqty qajettı infraqūrylymdy qamtamasyz etedı.
Daiyn sport keşenderı äkımdıkterdıŋ nemese mektepterdıŋ balansyna berıledı. Jaŋa nysandarda auyl balalarynyŋ jattyǧuy tegın ūiymdastyrylady. Būl bastama şalǧai eldı mekenderdegı sport infraqūrylymyn damytuǧa jäne balalardyŋ tūraqty türde sportpen ainalysuyna jaǧdai jasauǧa baǧyttalǧan.
AUYL SPORT jobasynyŋ qatysuşylary halyqaralyq jarystarda da el namysyn qorǧap jür. 2025–2026 jyldary auyl sportşylary Serbiia, Türkiia, Özbekstan, Grekiia, Qyrǧyzstan jäne basqa da memleketterde ötken 10 halyqaralyq jarysqa qatysyp, altyn, kümıs jäne qola jüldelerge ie boldy.
Aita keteiık, AUYL SPORT respublikalyq turnirı 3–7 qaraşa aralyǧynda ötedı. Jarystyŋ saltanatty aşylu räsımı 6 qaraşa künı saǧat 12:00-de ūiymdastyrylady. Turnirdıŋ tolyq kestesın, tıkelei efirlerın jäne nätijelerın ūiymdastyruşylardyŋ resmi saitynan — halyksport.kz jäne auylsport platformalarynan bıluge bolady.
