رەسەي ۇكىمەتى مەملەكەتتىك دۋماعا «حالىقارالىق دامۋعا جاردەمدەسۋ تۋرالى» ارنايى زاڭ جوباسىن ۇسىندى. بۇل تۋرالى «نەزاۆيسيمايا گازەتا» باسىلىمى جازدى، دەپ حابارلايدى «ادىرنا» ءتىلشىسى.
ونىڭ ماقساتى – مەملەكەتتىك ساياسات پەن مەملەكەتتىك رەتتەۋدىڭ جەكە ءبىر باعىتىن قالىپتاستىرۋ. زاڭ جوباسى جەكەلەگەن تۇزەتۋلەر جيىنتىعى ەمەس، تۇتاس قۇجات رەتىندە ازىرلەنگەن. سوندىقتان وندا كوزدەلگەن جاڭا باعىتتىڭ مازمۇنى ايقىن كورىنەدى. سىرتقى ساياسات ۆەدومستۆوسى جالپى باسشىلىقتى ءوز قۇزىرەتىندە قالدىرسا، «جۇمساق كۇش» ساياساتىن جۇزەگە اسىرۋ روسسوترۋدنيچەستۆو مىندەتىنە اينالادى.
«ال بۇل ساياساتتىڭ مازمۇنىنا كەلسەك، بۇرىننان بەلگىلى تاسىلدەردىڭ اراسىنان جاڭاسىن ىزدەۋدىڭ ورنىنا، كەڭەستىك كەزەڭدەگى اتىشۋلى «حالىقتىق ديپلوماتيا» ۇلگىسىنە قايتا ورالۋ تۋرالى شەشىم قابىلدانعان سىڭايلى. كەزىندە ونىڭ سان ءتۇرلى تەتىكتەرى مەملەكەتتىك قازىنا ەسەبىنەن قارجىلاندىرىلعان ەدى»،– دەلىنگەن حابارلامادا.
زاڭ جوباسىنا بەرىلگەن تۇسىندىرمە جازبادا ءتيىستى مەملەكەتتىك ساياساتتىڭ تۇجىرىمداماسى رەسەي پرەزيدەنتىنىڭ 2014 جىلعى جارلىعىمەن بەكىتىلگەنى ناقتىلانعان. ال 2023 جىلدىڭ ناۋرىزىندا وعان ەلەۋلى وزگەرىستەر ەنگىزىلگەن. سول قۇجاتتا بۇل باعدارلامانىڭ 2022 جىلدىڭ قاڭتارىنان باستاپ جۇزەگە اسىرىلىپ كەلە جاتقانى ايتىلادى.
«رەسەي ستراتەگيالىق تۇراقتىلىقتى ساقتاۋ، سونداي-اق قازىرگى الەمدەگى ىقپالدى ورتالىقتاردىڭ ءبىرى رەتىندەگى ەلدىڭ پوزيتسياسىن نىعايتۋ جانە تارتىمدىلىعىن ارتتىرۋ ءۇشىن قولايلى جاعدايلار جاساۋ ماقساتىندا حالىقارالىق دامۋعا جاردەمدەسۋ سالاسىندا بەلسەندى ءارى ماقساتتى ساياسات جۇرگىزىپ كەلەدى»، – دەلىنگەن قۇجاتتا.
بۇدان ءارى اتالعان باعىتتا قانداي ماسەلەلەر تۋىنداعانى تۇسىندىرىلەدى. اتاپ ايتقاندا، حالىقارالىق دامۋعا جاردەمدەسۋ جەكە سالا رەتىندە بولىنبەگەندىكتەن، بۇل باعىتتا جۇمىس ىستەيتىن ءتۇرلى مەملەكەتتىك ورگاندار مەن قۇرىلىمداردىڭ قىزمەتىن ناقتى اجىراتۋ قيىنعا سوعىپ وتىر. سونىڭ سالدارىنان ولاردىڭ جۇمىسىنىڭ تيىمدىلىگىن تالداۋ جانە «جالپى رەسەيدىڭ حالىقارالىق دامۋعا جاردەمدەسۋ جونىندەگى قىزمەتىن ۇيلەستىرۋ» كۇردەلەنگەن.
زاڭ جوباسىندا حالىقارالىق دامۋعا جاردەمدەسۋدىڭ 16 مىندەتى كورسەتىلگەن. ولاردىڭ اراسىندا قازىرگى كەزەڭ ءۇشىن وزەكتى ماسەلەلەر دە بار. ماسەلەن، «كورشىلەس مەملەكەتتەرمەن تاتۋ كورشىلىك قارىم-قاتىناس ورناتۋ، ولاردىڭ اۋماعىنداعى شيەلەنىس وشاقتارى مەن قاقتىعىستاردى جويۋعا، سونداي-اق بىتىمگەرلىك شارالارىن جۇزەگە اسىرۋ ارقىلى وسىنداي جاعدايلاردىڭ الدىن الۋعا جاردەمدەسۋ» مىندەتى قامتىلعان.
ايتا كەتەرلىگى، تمد ەلدەرى مەن ەۋرازيالىق ەكونوميكالىق قوعامداستىق اياسىنداعى ەكونوميكالىق ينتەگراتسيانى تەرەڭدەتۋ تۋرالى تۇجىرىم تەك مىندەتتەر تىزىمىندە عانا كەزدەسەدى. ال حالىقارالىق دامۋعا جاردەمدەسۋ سالاسىنداعى مەملەكەتتىك ساياسات سەرىكتەس مەملەكەتتەردى جانە ولاردىڭ بەلگىلى ءبىر مەملەكەتتىك باعىتتى ۇستانۋ قۇقىعىن قۇرمەتتەۋ قاعيداتتارىنا نەگىزدەلمەك.
