فوتو: اشىق دەرەككوزدەن
تۇركيادا بالالار مەن جاسوسپىرىمدەردىڭ الەۋمەتتىك جەلىلەردى پايدالانۋىنا قاتىستى جاڭا شەكتەۋلەر ەنگىزىلۋدە. جاڭا ەرەجەلەرگە سايكەس، 15 جاسقا تولماعان پايدالانۋشىلارعا تسيفرلىق پلاتفورمالاردىڭ قىزمەتىن پايدالانۋعا رۇقسات بەرىلمەيدى، دەپ حابارلايدى "ادىرنا".
TRT Haber تەلەارناسىنىڭ حابارلاۋىنشا، جاڭا تالاپتار الەۋمەتتىك جەلىلەردە بۇرىننان تىركەلگەن اككاۋنتتارعا دا قاتىستى بولادى. پايدالانۋشىلار وزدەرىنىڭ جاسىن 2027 جىلعى 31 ناۋرىزعا دەيىن راستاۋى ءتيىس. ال 15 جاسقا تولماعان بالالاردىڭ اككاۋنتتارى جابىلادى.
سونىمەن قاتار 15 پەن 17 جاس ارالىعىنداعى جاسوسپىرىمدەر ءۇشىن دە بىرقاتار شەكتەۋ قاراستىرىلعان. اتاپ ايتقاندا، ولاردىڭ الەۋمەتتىك جەلىدەگى پاراقشالارى ادەپكى رەجيمدە جابىق بولۋى كەرەك. سونداي-اق جەكە حابارلامالار الماسۋ جانە جازىلۋشىلار ءتىزىمىن كورۋ مۇمكىندىكتەرى شەكتەلەدى.
بۇدان بولەك، اتالعان جاس ساناتىنداعى پايدالانۋشىلارعا تىكەلەي ەفير جۇرگىزۋگە جانە جەكەلەندىرىلگەن جارناما كورسەتۋگە تىيىم سالىنادى.
جاڭا تالاپتار اياسىندا الەۋمەتتىك جەلى پلاتفورمالارى اتا-انالارعا ارنالعان باقىلاۋ قۇرالدارىن دا ۇسىنۋعا مىندەتتەلەدى. بۇل قۇرالدار ارقىلى اتا-انالار بالالارىنىڭ اككاۋنت باپتاۋلارىن باسقارىپ، الەۋمەتتىك جەلىلەردى پايدالانۋ ۋاقىتىن شەكتەي الادى. سونداي-اق اقىلى وپەراتسيالاردى باقىلاۋ مۇمكىندىگى قاراستىرىلادى.
جاڭا شەكتەۋلەر بالالاردىڭ ينتەرنەتتەگى قاۋىپسىزدىگىن قامتاماسىز ەتۋگە جانە ولاردىڭ الەۋمەتتىك جەلىلەردى پايدالانۋىن باقىلاۋدى كۇشەيتۋگە باعىتتالعان.
