قازاقستاننىڭ مادەني بىرەگەيلىگىن الەمگە تانىتاتىن ماڭىزدى قادام رەتىندە قازاقتىڭ ءداستۇرلى ويۋ-ورنەگى رەسمي تۇردە يسەسكو يسلام الەمى مۇرالارى تىزىمىنە ەندى. بۇل شەشىم 11 اقپاندا وتكەن يسەسكو يسلام الەمى مۇرالارى كوميتەتىنىڭ 13-سەسسياسىندا قابىلداندى، دەپ حابارلايدى "ادىرنا".
مەملەكەتتىك كەڭەسشى ەرلان قاريننىڭ پىكىرىنشە، ويۋ-ورنەك – ۇلتتىق مادەنيەتىمىزدىڭ نەگىزگى ەتنومادەني كودى، تاريحي ساباقتاستىعىمىز بەن بىرەگەيلىگىمىزدى نىعايتۋعا ىقپال ەتەتىن ماڭىزدى ەلەمەنت. ونىڭ يسەسكو تىزىمىنە ەنۋى قازاقستاننىڭ ماتەريالدىق ەمەس مادەني مۇراسىن حالىقارالىق دەڭگەيدە ىلگەرىلەتۋدەگى ۇلكەن جەتىستىك بولىپ سانالادى.
"ويۋ-ورنەكتىڭ يسەسكو-نىڭ بەدەلدى تىزىمىنە ەنۋى – قازاقستاننىڭ ماتەريالدىق ەمەس مادەني مۇراسىن حالىقارالىق دەڭگەيدە ىلگەرىلەتۋدەگى ماڭىزدى قادام.
بۇعان دەيىن، ياعني 2023 جىلى يسەسكو تىزىمىنە تۇركى وركەنيەتىنىڭ باستى نىشاندارىنىڭ بىرىنە اينالعان ءداستۇرلى «توعىزقۇمالاق» ويىنى قوسىلعان بولاتىن.
پرەزيدەنتتىڭ ۇلتتىق قۇرىلتاي وتىرىستارىندا بەرگەن تاپسىرمالارىنا سايكەس، قازاقستاننىڭ مادەني مۇرا نىساندارىن يۋنەسكو جانە يسەسكو تىزىمدەرىنە ەنگىزۋ جۇمىسى جالعاساتىن بولادى", - دەپ جازدى ەرلان قارين.
ۇقساس جاڭالىقتار
