ۋكراينا پرەزيدەنتى ۆلاديمير زەلەنسكي كيەۆتىڭ رەسەي باقىلاۋىنداعى اۋماقتاردان باس تارتپايتىنىن مالىمدەدى. بۇل تۋرالى ول تۇركياعا ساپارى اياسىندا CNN Türk تەلەارناسىنا بەرگەن سۇحباتىندا ايتتى، دەپ حابارلايدى “ادىرنا”.
زەلەنسكيدىڭ سوزىنشە، قىرىمدى قوسا العاندا، ۋكراينانىڭ شىعىس اۋماقتارىن رەسەيدىڭ مەنشىگى دەپ تانۋ ەلدىڭ كونستيتۋتسياسىنا، قوعامنىڭ ۇستانىمى مەن ۇلتتىق نامىسىنا قايشى كەلەدى. ونىڭ ايتۋىنشا، ماسكەۋ بۇل تالاپتى ءتۇرلى دەلدالدار ارقىلى جەتكىزۋگە تىرىسىپ كەلەدى.
ۋكراينا باسشىسى قازىرگى مايدان شەبىندە اتىستى توقتاتۋدى قامتاماسىز ەتۋدى باستى باسىمدىق رەتىندە اتادى. ال وزگە ماسەلەلەردى كەيىنگى كەلىسسوزدەر بارىسىندا تالقىلاۋ قاجەت ەكەنىن جەتكىزدى.
سونداي-اق زەلەنسكي ۋكراينا مەن رەسەي اراسىنداعى ىقتيمال بەيبىت كەلىسسوزدەردە ەنەرگەتيكا سالاسى، تەڭىزدەگى اتىستى توقتاتۋ جانە تۇتقىندار الماسۋ ماسەلەلەرى قاراستىرىلۋى مۇمكىن ەكەنىن ايتتى.
ونىڭ پىكىرىنشە، الداعى ءسامميتتىڭ نەگىزگى ماقساتى – ەشقانداي الدىن الا شارتسىز تولىق اتىستى توقتاتۋعا قول جەتكىزۋ جانە ونىڭ ورىندالۋىن ءتيىمدى باقىلاۋ تەتىگىن قالىپتاستىرۋ. بۇدان كەيىن سوعىستى اياقتاۋعا باعىتتالعان جول كارتاسى ازىرلەنۋى ءتيىس.
زەلەنسكي قاۋىپسىزدىك كەپىلدىكتەرى ماسەلەسىنە دە توقتالدى. ول ۋكرايناعا قاۋىپسىزدىك كەپىلدىكتەرى قاجەت ەكەنىن ايتىپ، رەسەي تاراپىنان دا مۇنداي ماسەلە كوتەرىلىپ وتىرعان جاعدايدا ونى تالقىلاۋعا دايىن ەكەنىن جەتكىزدى.
بۇعان دەيىن ۋكراينا پرەزيدەنتى رەسەي باسشىسى ۆلاديمير پۋتينمەن تۇركيادا كەزدەسۋگە دايىن ەكەنىن مالىمدەگەن بولاتىن.
