اۋىل شارۋاشىلىعى مينيسترلىگى وتاندىق وسىمدىك شارۋاشىلىعىنىڭ تيىمدىلىگىن ارتتىرۋ، زاماناۋي اگروتەحنولوگيالاردى ەنگىزۋ جانە اگرارلىق ءوندىرىستىڭ كليمات وزگەرىستەرىنە توزىمدىلىگىن نىعايتۋ باعىتىنداعى جۇيەلى جۇمىستاردى جالعاستىرۋدا.
نەگىزگى ءىس-شارالار مەملەكەت باسشىسىنىڭ اۋىل شارۋاشىلىعىنىڭ جالپى ءونىم كولەمىن ەكى ەسەگە ارتتىرۋ جونىندەگى تاپسىرماسىن ورىنداۋ ماقساتىندا ازىرلەنگەن 2024–2028 جىلدارعا ارنالعان جول كارتاسىندا كوزدەلگەن.
باسىم باعىتتاردىڭ ءبىرى – جوعارى تابىستى داقىلداردىڭ ۇلەسىن ارتتىرۋ ارقىلى ەگىس القاپتارىنىڭ قۇرىلىمىن ودان ءارى ءارتاراپتاندىرۋ. بۇل ءتاسىل اۋىل شارۋاشىلىعى جەرلەرىن پايدالانۋدىڭ ەكونوميكالىق تيىمدىلىگىن ارتتىرىپ، ءوندىرىستىڭ تۇراقتىلىعىن نىعايتۋعا مۇمكىندىك بەرەدى.
تۇقىم ماتەريالىنىڭ ساپاسىنا ەرەكشە نازار اۋدارىلادى. بيىل ەليتالىق تۇقىمداردىڭ ۇلەسى جوسپارلانعان 11,6%-دان اسىپ، 12%-عا جەتتى. بۇل كورسەتكىشتى ودان ءارى ارتتىرۋ داقىلداردىڭ ونىمدىلىگى مەن قولايسىز جاعدايلارعا توزىمدىلىگىن كوتەرۋدىڭ ماڭىزدى فاكتورلارىنىڭ ءبىرى رەتىندە قاراستىرىلادى.
تاعى ءبىر ماڭىزدى مىندەت – مينەرالدى تىڭايتقىشتاردى قولدانۋ كولەمىن ۇلعايتۋ. بيىل اگرارشىلار 2,2 ملن توننا مينەرالدى تىڭايتقىش ەنگىزدى. بۇل عىلىمي نەگىزدەلگەن قاجەتتىلىكتىڭ 66%-ىن قۇرايدى. تىڭايتقىشتاردى قولدانۋ كولەمىن ودان ءارى ارتتىرۋ ەگىنشىلىك تيىمدىلىگىن كوتەرىپ، اۋىل شارۋاشىلىعى القاپتارىنىڭ ونىمدىلىگىن جاقسارتۋعا مۇمكىندىك بەرەدى.
ماشينا-تراكتور پاركىن جاڭارتۋ جۇمىستارى دا جالعاسادى. بيىل تەحنيكانى جاڭارتۋ دەڭگەيى 7%-عا جەتتى، ال جىل قورىتىندىسى بويىنشا بۇل كورسەتكىشتى 8%-عا جەتكىزۋ جوسپارلانىپ وتىر. سونىمەن قاتار سۋ ۇنەمدەۋ تەحنولوگيالارىن قولدانۋ اۋقىمى كەڭەيتىلەدى. بۇل كليماتتىڭ وزگەرۋى جانە سۋ رەسۋرستارىنا تۇسەتىن جۇكتەمەنىڭ ارتۋى جاعدايىندا ەرەكشە وزەكتى.
اتالعان شارالاردى كەشەندى ىسكە اسىرۋ ەگىنشىلىكتىڭ ونىمدىلىگى جوعارى ءارى تەحنولوگيالىق تۇرعىدان دامىعان مودەلىنە كوشۋگە باعىتتالعان. باستى ماقسات – ءار گەكتاردان الىناتىن ءونىم كولەمىن تۇراقتى ارتتىرۋ، ءونىمنىڭ وزىندىك قۇنىن تومەندەتۋ جانە قازاقستاندىق اۋىل شارۋاشىلىعىنىڭ ىشكى جانە سىرتقى نارىقتارداعى باسەكەگە قابىلەتتىلىگىن نىعايتۋ.
