قازاقستان قارۋلى كۇشتەرىنىڭ اسكەري قىزمەتشىلەرى اقش-تىڭ اريزونا شتاتىنداعى كەمپ ناۆاحو اسكەري بازاسىندا ءوتىپ جاتقان «Best Warrior – 2025» حالىقارالىق اسكەري سايىسىندا ەل نامىسىن قورعادى، دەپ حابارلايدى "ادىرنا" ۇلتتىق پورتالى قر قارۋلى كۇشتەرىنە سىلتەپ.
بايقاۋعا ەلىمىزدەن قاتىسىپ جاتقان — 54835 اسكەري ءبولىمىنىڭ 3-سىنىپتى سەرجانتى اسلان دارحان مەن 18404 ءبولىمىنىڭ گۆارديا سەرجانتى راۋان توقتاربەكوۆ. ەكەۋى دە بۇعان دەيىن كاسىبي شەبەرلىكتەرىن دالەلدەپ، جۇلدەلى ورىنداردى يەلەنگەن تاجىريبەلى جاۋىنگەرلەر.
18 مامىرعا دەيىن جالعاساتىن سايىسقا اقش-تىڭ 7 شتاتى، سونداي-اق فيدجي، گۋام، تونگا مەن فيليپپيننەن كەلگەن ۇزدىك ساربازدار قاتىسۋدا. اريزونا ۇلتتىق گۆاردياسى ۇيىمداستىراتىن بايقاۋدا قاتىسۋشىلار ارميالىق فيتنەستەن باستاپ، تاكتيكالىق مەديتسيناعا دەيىنگى 10 ءتۇرلى كۇردەلى سىناقتان وتەدى. ولاردىڭ قاتارىندا تۇنگى كۇزەت، جەرگىلىكتى جەردى باعدارلاۋ، م-240ۆ پۋلەمەتىنەن اتۋ جانە 22 شاقىرىمدىق اسكەري جورىق بار.
3-سىنىپتى سەرجانت اسلان دارحاننىڭ 800 مەترلىك جۇگىرۋ كەزەڭىندە تىركەگەن 2 مينۋت 5 سەكۋندتىق كورسەتكىشى بولدى. بۇل ناتيجە اريزونا ۇلتتىق گۆاردياسى بايقاۋ تاريحىنداعى رەكورد رەتىندە تىركەلىپ، ەرەكشە جەتىستىك رەتىندە سانالىپ وتىر.
ۇقساس جاڭالىقتار
