ۋكراينا پرەزيدەنتى ۆلاديمير زەلەنسكي اقش-پەن اراداعى ستراتەگيالىق رەسۋرستارعا قول جەتكىزۋ تۋرالى قۇپيا كەلىسىم جوباسىنىڭ جاريالانىپ كەتۋىنە بايلانىستى سىرتقى بارلاۋ قىزمەتىنە (سبۋ) تەرگەۋ جۇرگىزۋدى تاپسىردى. بۇل كەلىسىم جوباسى امەريكالىق كومپانيالارعا ۋكراينا اۋماعىنداعى بارلىق پايدالى قازبالاردى وندىرۋگە باسىمدىق بەرۋدى كوزدەگەنى تۋرالى اقپارات تارادى، دەپ حابارلايدى "ادىرنا" ۇلتتىق پورتالى.
Financial Times مالىمەتىنشە، تەرگەۋ شەڭبەرىندە ءتۇرلى ۆەدومستۆولاردىڭ قىزمەتكەرلەرى تەكسەرىلىپ جاتىر، كەيبىرىنە پوليگراف (وتىرىك دەتەكتورى) قولدانىلادى. قانشا ادامنىڭ جاۋاپقا تارتىلعانى ازىرگە بەلگىسىز.
سبۋ بۇل تەرگەۋدى زاڭ اياسىندا جۇرگىزىپ جاتقانىن مالىمدەپ، وپەراتسيالىق ارەكەتتەرگە تۇسىنىكتەمە بەرۋدەن باس تارتتى. ال پرەزيدەنت كەڭسەسى دە پىكىر بىلدىرمەدى.
26 ناۋرىزدا دەپۋتات ياروسلاۆ جەلەزنياك اتالعان قۇجاتتىڭ كوشىرەسىن جاريالاعان. كەلەسى كۇنى-اق Financial Times ءوز نۇسقاسىن جاريالاپ، كەلىسىمنىڭ باستى تارماقتارىن تالداپ شىقتى.
28 ناۋرىزدا زەلەنسكي بۇل جاعدايعا پىكىر ءبىلدىردى.
«بۇل اقپاراتتى كىم تاراتقانى مەن ءۇشىن وتە ماڭىزدى»، – دەدى ول.
جوبانىڭ جاڭارتىلعان نۇسقاسى اقش-تىڭ بۇرىنعى پرەزيدەنتى دونالد ترامپتىڭ اكىمشىلىگى تاراپىنان ۇسىنىلعان. اقپان ايىندا كەلىسىلگەن نۇسقادان بۇل جوبا تۇبەگەيلى وزگەشە. وندا ۋكراينا قاۋىپسىزدىگىنە قاتىستى ەشقانداي كەپىلدىك قاراستىرىلماعان. سونىمەن قاتار قۇجات بويىنشا ۋكرايناداعى مۇناي، گاز جانە باسقا دا رەسۋرستاردان تۇسەتىن تابىستى باقىلايتىن بىرلەسكەن كەڭەس قۇرۋ كوزدەلگەن.
كيەۆ بيلىگى بۇل جوبانى ەلدىڭ ستراتەگيالىق اكتيۆتەرى شەتەلدىك قۇرىلىمداردىڭ باقىلاۋىنا ءوتۋى مۇمكىن دەپ قاۋىپتەنەدى. بۇدان بولەك، اقش اسكەري كومەكتى گرانت ەمەس، قايتارىمدى نەسيە تۇرىندە بەرۋ شارتىن قويعان.
اقش قارجى ءمينيسترى سكوتت بەسسەنت بۇل ينۆەستيتسيالاردىڭ ءوزى رەسەيگە قارسى قورعانىس فاكتورى ەكەنىن ايتتى. الايدا كيەۆ بۇل ۇستانىمدى قولدامادى.
پرەزيدەنت زەلەنسكي اقش تاراپىنان ۇسىنىلعان جاڭا تالاپتاردى اشىق تۇردە قابىلداماي تاستادى. بۇعان جاۋاپ رەتىندە دونالد ترامپ زەلەنسكيدى كەلىسىمدى بۇزباق بولدى دەپ ايىپتاپ، قۇجاتقا قول قويىلماسا «ۇلكەن قيىندىقتار» بولاتىنىن ەسكەرتكەن ەدى.
