انكارا قالاسىندا وتكەن تۇركى مەملەكەتتەرى ۇيىمىنىڭ XIII ءسامميتى اياسىندا مەملەكەت جانە قوعام قايراتكەرى، بەلگىلى مۋزىكانت ءارى ديپلومات دۇيسەن قورابايۇلى قاسەيىنوۆ الىشەر ناۋاي اتىنداعى «تۇركى الەمىنىڭ بىرلىگىنە قوسقان ۇلەسى ءۇشىن» حالىقارالىق سىيلىعىمەن ماراپاتتالدى. ايگىلى سكريپكاشى اتالعان ماراپاتتىڭ ءۇشىنشى يەگەرى اتاندى.
2021 جىلى وزبەكستان پرەزيدەنتى شاۆكات ميرزيوەۆتىڭ باستاماسىمەن تاعايىندالعان بۇل حالىقارالىق سىيلىق تۇركى حالىقتارىنىڭ مادەني مۇراسىن جاھاندىق دەڭگەيدە دارىپتەۋگە، سونداي-اق ولاردىڭ اراسىنداعى رۋحاني جانە مادەني ىنتىماقتاستىقتى دامىتۋعا ەلەۋلى ۇلەس قوسقان تۇلعالارعا بەرىلەدى.
سىيلىقتىڭ العاشقى لاۋرەاتى رەتىندە كورنەكتى قىرعىز جازۋشىسى شىڭعىس ايتماتوۆ اتالدى. وعان ماراپات 2022 جىلى، دۇنيەدەن وتكەننەن كەيىن بەرىلدى. ال 2025 جىلى بۇل قۇرمەتكە تۇرىك عالىمى، نوبەل سىيلىعىنىڭ لاۋرەاتى ازيز ساندجار يە بولدى.
دۇيسەن قاسەيىنوۆ – تۇركى حالىقتارىنىڭ مادەني بايلانىسىن نىعايتۋعا بىرنەشە ونجىلدىق بويى ەڭبەك ءسىڭىرىپ كەلە جاتقان كورنەكتى مادەنيەت قايراتكەرى. ونىڭ تۇركى الەمىنىڭ ونەرى مەن رۋحانياتىن حالىقارالىق دەڭگەيدە تانىتۋ جولىنداعى قىزمەتى كوپتەگەن ماڭىزدى جوبالار ارقىلى جۇزەگە استى.
1989 جىلى قۇرمانعازى اتىنداعى قازاق ۇلتتىق كونسەرۆاتورياسىنىڭ رەكتورى قىزمەتىن اتقارعان كەزەڭدە «ينتەروركەستر-89» جوباسىن ۇيىمداستىرىپ، قازاقستان مەن ورتالىق ازيا ەلدەرىنىڭ جاس مۋزىكانتتارىن ءبىر ارناعا توعىستىردى. وسى باستامادان كەيىن تۇركى حالىقتارىنىڭ ءداستۇرلى مۋزىكاسىن زەرتتەۋ مەن ناسيحاتتاۋعا ارنالعان عىلىمي كونفەرەنتسيالار، حالىقارالىق فەستيۆالدەر جانە كونتسەرتتىك باعدارلامالار تۇراقتى تۇردە وتكىزىلە باستادى.
دۇيسەن قاسەيىنوۆتىڭ تۇركسوي حالىقارالىق ۇيىمىنىڭ باس حاتشىسى رەتىندەگى قىزمەتى تۇركى مادەنيەتىن الەمدىك كەڭىستىكتە تانىتۋعا تىڭ سەرپىن بەردى. ونىڭ باستاماسىمەن جۇزەگە اسقان اۋقىمدى جوبالاردىڭ ءبىرى – ناۋرىز مەرەكەسىن حالىقارالىق دەڭگەيدە دارىپتەۋ بولدى.
2009 جىلدىڭ ناۋرىز ايىندا تۇركسوي ۇيىمى پاريجدەگى يۋنەسكو شتاب-پاتەرىندە تۇركى حالىقتارى ونەرپازدارىنىڭ قاتىسۋىمەن ناۋرىز مەرەكەسىنە ارنالعان ۇلكەن مادەني شارا وتكىزدى. بۇل باستاما مەرەكەنىڭ حالىقارالىق دەڭگەيدە تانىلۋىنا جول اشتى. 2010 جىلعى 23 اقپاندا بۇۇ باس اسسامبلەياسى 21 ناۋرىزدى حالىقارالىق ناۋرىز كۇنى دەپ جاريالادى.
سول جىلدىڭ ناۋرىز ايىندا تۇركسوي ۇيىمى اقش-تا، بۇۇ باس اسسامبلەياسىنىڭ زالىندا تۇڭعىش رەت حالىقارالىق ناۋرىز مەرەكەسىن ۇيىمداستىردى. اتالعان باستامانىڭ جوعارى دەڭگەيدە ءوتۋى ناتيجەسىندە 2015 جىلى يۋنەسكو-دا، ال 2016 جىلى بىرىككەن ۇلتتار ۇيىمىندا ناۋرىز كۇندەرى قايتا وتكىزىلدى.
وسىلايشا، ناۋرىز مەرەكەسى تۇركى حالىقتارىنىڭ ورتاق مەيرامى شەڭبەرىنەن شىعىپ، الەم حالىقتارىن بىرىكتىرەتىن حالىقارالىق مادەني قۇندىلىق رەتىندە كەڭىنەن تانىلا باستادى.
دۇيسەن قاسەيىنوۆتىڭ باستاماسىمەن جۇزەگە اسقان ماڭىزدى جوبالاردىڭ قاتارىندا «تۇركى الەمىنىڭ مادەني استاناسى» باعدارلاماسى، تۇركى الەمىنىڭ سيمفونيالىق وركەسترىن قۇرۋ جانە «يۋنۋس ەمرە» وراتورياسىن حالىقارالىق ساحناعا شىعارۋ بار.
سونداي-اق 2009–2010 جىلدارى جەتى مەملەكەتتىڭ سوليستەرى مەن حور ارتىستەرى قاتىسقان «كورۇعلى» وپەراسىنىڭ حالىقارالىق قويىلىمى ءتورت ەلدە ساحنالانىپ، كورەرمەندەردىڭ ۇلكەن قىزىعۋشىلىعىن تۋدىردى. ء«بىرجان-سارا» وپەراسىنىڭ تۇرىك تىلىندەگى نۇسقاسى تۇركيا تەاترلارىنىڭ تۇراقتى رەپەرتۋارىنا ەنسە، ە. راحماديەۆتىڭ «الپامىس» وپەراسى باكۋ وپەرا تەاترىندا قويىلدى.
بۇدان بولەك، ازەربايجان، يران، رەسەي، قازاقستان جانە تۇرىكمەنستان تەاتر ۇجىمدارىنىڭ قاتىسۋىمەن اقتاۋ قالاسىندا كاسپي ماڭى ەلدەرىنىڭ تەاتر فەستيۆالى ۇيىمداستىرىلدى. كەيىن بۇل مادەني شارا ءداستۇرلى حالىقارالىق فەستيۆالگە اينالدى
