ىستامبۇل داڭعىلدارىنىڭ بىرىنە قازاقتىڭ ۇلى اعارتۋشىسى ابايدىڭ ەسىمى بەرىلدى، - دەپ حابارلايدى "ادىرنا" ۇلتتىق پورتالى كتك تەلەارناسىنا سىلتەمە جاساپ.
⠀
بۇل تۋرالى تۇركيادا تۇراتىن قازاق دياسپوراسىنىڭ كەزدەسۋى كەزىندە بەلگىلى بولدى. ىستامبۇلداعى قازاقتاردىڭ كوبى زەيتينبۋرنۋ ايماعىندا تۇرادى. دياسپورا وكىلدەرى ۇنەمى كەزدەسىپ، قالانىڭ الەۋمەتتىك ومىرىنە بەلسەندى قاتىسادى. ىستامبۇلداعى قازاقستان كونسۋلدىعى ۇيىمداستىرعان سوڭعى كەزدەسۋ اياسىندا وتكەن عاسىردىڭ 50-ءشى جىلدارى تۇركياعا قونىس اۋدارعان قازاقتاردىڭ ۇرپاقتارى جينالدى.
⠀
"بۇگىنگى كەزدەسۋدە كوپتەگەن ماڭىزدى ماسەلەلەر تالقىلاندى. ىستامبۇلدا تۇراتىن جەرگىلىكتى قازاق جاستارى كونسۋلعا ءوز سۇراقتارىن قويدى. ال ءبىزدىڭ اي سايىنعى "قازاق ەلى" جۋرنالىمىزدىڭ كەزەكتى ءنومىرىن ابايعا ارنادى. مۇنداي كەزدەسۋلەر جالعاسادى دەپ ۇمىتتەنەمىز", - دەدى تۇرىك قازاقتارى بىرلەستىگىنىڭ باسشىسى ەرتولقىن عايرەتۋللاح.
⠀
تەلەارنا اتاپ وتكەندەي، تۇركيا تۇرعىندارى ابايمەن جاقسى تانىس. ءار ءتۇرلى قالالاردا اقىننىڭ قۇرمەتىنە كوشەلەر مەن ساياباقتار اتالعان. اقىننىڭ ەسىمى ىستامبۇلداعى مەكتەپتەردىڭ بىرىنە بەرىلگەن. سونىمەن قاتار 4 كۇن بۇرىن انتاليادا اباي ەسكەرتكىشى اشىلدى. ال ەندى ىستامبۇلداعى ۇلكەن داڭعىلعا اباي ەسىمە بەرىلدى. تاعى اتاپ وتەتىنىمىز، دياسپورا وكىلدەرى ءۇشىن قازاق تىلىنەن قوسىمشا كۋرستار ەنگىزىلۋدە.
⠀
"مەن ىستامبۇلدا تۋىپ-وسكەن قازاقپىن. سوندىقتان مەن ءۇشىن قازاق ءتىلىن ۇيرەنۋ وتە ماڭىزدى. ءبىز وسىنداي كەزدەسۋلەردى ءجيى وتكىزۋگە كەلىستىك. ەگەر ءبىز ۇنەمى كەزدەسىپ وتىرساق، انا ءتىلىمىزدى ۇيرەنىپ، بىرلىگىمىزدى نىعايتا الامىز", - دەدى ىستامبۇل تۇرعىنى گاپپار ورحۋن اقداگ.
⠀
ىستامبۇل سياقتى ۇلكەن قالادا اباي قۇرمەتىنە كوشە اتاۋ وڭاي شارۋا ەمەس. انكاراداعى قازاقستان ەلشىلىگى مەن ىستامبۇلداعى كونسۋلدىقتىڭ كۇش-جىگەرىنىڭ ارقاسىندا بۇل ماسەلە تەز شەشىلدى.
"ادىرنا" ۇلتتىق پورتالى
