قازاقستان مەن اقش اراسىنداعى تىكەلەي اۋە رەيسىنىڭ ءالى ىسكە قوسىلماۋىنا ۇشاق جەتكىزۋدەگى كەشىگۋلەر سەبەپ بولىپ وتىر، دەپ حابارلايدى "ادىرنا" ۇلتتىق پورتالى ينفورمبيۋروعا سىلتەپ.
بۇل تۋرالى كولىك ءمينيسترى نۇرلان ساۋرانباەۆ ۇكىمەتتەگى بريفينگ بارىسىندا مالىمدەدى.
ءمينيستردىڭ ايتۋىنشا، رەيستەر سولتۇستىك پوليۋس باعىتى ارقىلى جۇزەگە اسىرىلۋى ءتيىس، ياعني اۋە كەمەلەرى رەسەي اۋماعى ارقىلى وتەدى. مۇنداي قاشىق باعىتقا ارنايى جاڭا بۋىن Dreamliner ۇلگىسىندەگى الىسقا ۇشاتىن ۇشاقتار قاجەت.
"بۇل باعىتقا ەڭ الدىمەن جاڭا ۇشاقتىڭ بولۋى ماڭىزدى. الايدا Airbus پەن Boeing ءاۆياوندىرىس كومپانيالارىندا تاپسىرىستار 14 جىلعا دەيىن تولىق جۇكتەلگەن. سونىڭ سالدارىنان ءبىزدىڭ كەزەگىمىز دە كەيىنگە شەگەرىلىپ وتىر", – دەدى نۇرلان ساۋرانباەۆ.
ونىڭ سوزىنشە، قازاقستان اۋە تاسىمالداۋشىلارىنا كەلەسى جىلى بەرىلۋى ءتيىس بولعان اۋە كەمەلەرى ەندى تەك 2027 جىلى جەتكىزىلەدى.
قازىرگى جاعدايدا اقش باعىتى بويىنشا ۋاقىتشا بالاما نۇسقا قاراستىرىلىپ وتىر. Air Astana اۋە كومپانياسى رەيستەردى لوندون ارقىلى ورىنداۋدى ۇسىنعان.
"لوندونعا دەيىن ۇشىپ بارىپ، سول جەردە قونعاننان كەيىن بورت اۋىستىرماي، ارى قاراي اقش-قا جول تارتادى. قازىر Dreamliner ۇشاقتارى كەلگەنگە دەيىن وسى ارالىق باعىت پىسىقتالۋدا", – دەپ تۇيىندەدى مينيستر.
ايتا كەتەيىك، بۇعان دەيىن ازاماتتىق اۆياتسيا كوميتەتى قازاقستان مەن اقش اراسىنداعى تىكەلەي رەيس 2025 جىلدىڭ سوڭىندا اشىلادى دەپ حابارلاعان ەدى.
