الماتى-شىمكەنت رەيسىنەن اۋەجايدا تۇكىرگەن قىتاي ازاماتى شىعارىلدى. بۇل تۋرالى كولىكتەگى پوليتسيا دەپارتامەنتىنىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
«الماتى قالاسى اۋەجايىندا جەلىلىك پوليتسيا ءبولىمىنىڭ قىزمەتكەرلەرى الماتى – شىمكەنت رەيسىمەن ۇشقالى جاتقان 34 جاستاعى قىتاي ازاماتىن ۇستادى. تەكسەرۋ بارىسىندا انىقتالعانداي، بۇل ازامات كۇتۋ زالىندا وتىرعاندا قوعامدىق ورىنعا تۇكىرىپ، ادامدارعا دەگەن قۇرمەتسىزدىك تانىتىپ، جالپى پايدالانۋعا ارنالعان ورىندى لاستادى. قۇقىق بۇزۋشى قوعامدىق ورىنداردى لاستاعانى ءۇشىن 5 مرپ (19 660 تەڭگە) كولەمىندە ايىپپۇل سالىنىپ، رەيستەن ءتۇسىرىلدى»، – دەلىنگەن حابارلامادا.
قۇقىق قورعاۋ ورگاندارى بيىلعى جىلدىڭ باسىنان بەرى كولىكتەگى پوليتسيا دەپارتامەنتى ءتۇرلى اكىمشىلىك قۇقىق بۇزۋشىلىق جاساعان 5249 تۇلعانى جاۋاپقا تارتقانىن، سونىڭ ىشىندە قوعامدىق ورىنداردى لاستاعان 499 ادام بولعانىن ەسكە سالدى.
