ءيزرايلدىڭ يرانعا قارسى سوققىسى ءۇش تولقىندى شابۋىلمەن اياقتالدى، دەپ حابارلايدى “ادىرنا” ۇلتتىق پورتالى.
CNN مالىمەتىنشە، سەنبى كۇنى يزرايل شابۋىل جاساعان كەزدە يراندا تاڭ جاڭا اتىپ كەلە جاتقان. دەگەنمەن، شابۋىلدىڭ ناقتى ماقساتى مەن كەلتىرىلگەن زالالدىڭ كولەمى ءالى دە بەلگىسىز كۇيدە قالۋدا.
كەيىن يزرايل اسكەري كۇشتەرى يرانداعى اسكەري نىساندارعا «ناقتى جانە ماقساتتى» اۋە سوققىلارى جاسالعانىن مالىمدەدى. يزرايل قورعانىس كۇشتەرىنىڭ مالىمدەمەسىندە:
«ءبىز جاۋاپ سوققى جاسادىق، ميسسيا ءساتتى ورىندالدى. ءبىزدىڭ ۇشاقتارىمىز امان-ەسەن ورالدى»، – دەلىنگەن.
بۇل سوققىلار يزرايل قارۋلى كۇشتەرىنىڭ مالىمدەۋىنشە، يران رەجيمىنىڭ يزرايلگە بىرنەشە اي بويى جاساعان ۇزدىكسىز شابۋىلدارىنا جاۋاپ رەتىندە ىسكە اسىرىلدى. بۇل تۇستا، اسىرەسە، قازان ايىنىڭ باسىندا يراننىڭ ءيزرايلدى 180 زىمىرانمەن تومپەشتەۋى نازارعا الىنعان.
«يران رەجيمىنىڭ يزرايل مەملەكەتىنە ۇزدىكسىز جاسالعان شابۋىلدارىنا جاۋاپ رەتىندە يزرايل قورعانىس كۇشتەرى يرانداعى اسكەري نىساندارعا ناقتى سوققىلار جاسادى»، – دەلىنگەن رەسمي حابارلامادا.
اتالعان وپەراتسيا يران مەن يزرايل اراسىنداعى ۇزاق ۋاقىتتان بەرى جالعاسىپ كەلە جاتقان شيەلەنىستى ودان ءارى ءورشىتىپ، تاياۋ شىعىس ايماعىنداعى تۇراقتىلىققا ۇلكەن قاۋىپ توندىرۋدە.
ەكى تاراپتىڭ دا اسكەري قاقتىعىستارعا دايىن ەكەندىگىن بايقاتقان بۇل جاعداي ايماقتاعى گەوساياسي جاعدايدى كۇردەلەندىرە ءتۇستى.
«يسلام رەسپۋبليكاسىنىڭ شەنەۋنىكتەرى قىلمىستىق جانە زاڭسىز يزرايلدىك رەجيمدى كەز كەلگەن اۆانتيۋريستىك ارەكەتتەن اۋلاق بولۋعا الدىن الا ەسكەرتكەن. بىراق بۇگىن تاڭەرتەڭ بۇل جالعان رەجيم تەگەران، حۋزەستان جانە يلام پروۆينتسيالارىنداعى اسكەري ورتالىقتارعا شابۋىل جاسادى»، – دەلىنگەن يران مەملەكەتىنىڭ مالىمدەمەسىندە.
يرنا دەرەگىندە بۇل شابۋىل ەلدىڭ اۋە قورعانىس جۇيەسى ارقىلى ءساتتى توسىلىپ، تويتارىلعانى ايتىلعان.
«كەيبىر ايماقتاردا ازداعان زالال كەلتىرىلگەن. وقيعانىڭ اۋقىمى ءالى دە تەكسەرىلۋدە»، – دەلىنگەن قۇجاتتا.
