اقش اسكەرى يرانعا «ەلەۋلى زالال كەلتىرۋ ماقساتىندا» جاڭا اۋقىمدى سوققىلار جاسادى. بۇل ارەكەت تەگەراننىڭ ورمۇز بۇعازى ماڭىنداعى ءۇش تانكەرگە جاساعان شابۋىلىنا جاۋاپ رەتىندە جۇزەگە اسىرىلعان، دەپ حابارلايدى «ادىرنا» ءتىلشىسى.
«يران كورسەتكەن اگرەسسيا نەگىزسىز، قاۋىپتى بولدى. سونداي-اق اتىستى توقتاتۋ رەجيمىن ورەسكەل بۇزدى »، – دەلىنگەن اقش ورتالىق قولباسشىلىعىنىڭ 7 شىلدە كەشىندە ح الەۋمەتتىك جەلىسىندە جاريالاعان مالىمدەمەسىندە.
سەيسەنبى كۇنى ورمۇز بۇعازىندا ەكى تانكەرگە شابۋىل جاسالسا، تاعى ءبىر تانكەر دۇيسەنبى كۇنى نىساناعا الىنعان. قاتار سۇيىتىلعان گاز تاسىمالداعان تانكەرگە جاسالعان شابۋىل ءۇشىن يراندى ايىپتادى. كەمەنىڭ ماشينا بولىمىندە ءورت شىعىپ، ەكيپاج ەۆاكۋاتسيالانعان. Reuters اگەنتتىگىنىڭ دەرەككوزدەرى ءورتتىڭ جارىلىسقا ۇلاسۋى مۇمكىن بولعانىن حابارلادى. بۇقارالىق اقپارات قۇرالدارى سونداي-اق ومان جاعالاۋىندا ساۋد ارابياسىنىڭ تۋىمەن جۇزگەن تانكەردىڭ زاقىمدانعانىن جازدى. تەگەران بۇل شابۋىلدار ءۇشىن جاۋاپكەرشىلىكتى ءوز موينىنا العان جوق.
Reuters جانە Axios باسىلىمدارىنىڭ حابارلاۋىنشا، اقش-تىڭ جاۋاپ سوققىلارى يراننىڭ اۋە شابۋىلىنا قارسى قورعانىس جۇيەلەرىنە، جاعالاۋداعى باقىلاۋ نىساندارىنا، قاناتتى زىمىراندارعا، درون ۇشىرۋ قوندىرعىلارىنا جانە پورت ينفراقۇرىلىمىنا باعىتتالعان.
كەيىنىرەك اقش ورتالىق قولباسشىلىعى جاڭا سوققىلار سەرياسىنىڭ اياقتالعانىن جانە 80-نەن استام نىساننىڭ جويىلعانىن مالىمدەدى. ولاردىڭ قاتارىندا اۋە قورعانىسى جۇيەلەرى، باسقارۋ پۋنكتتەرى، جاعالاۋداعى راديولوكاتسيالىق ستانتسيالار، كەمەگە قارسى زىمىران كەشەندەرى جانە يسلام رەۆوليۋتسياسى ساقشىلار كورپۋسىنىڭ شاعىن كاتەرلەرى بار.
Axios دەرەككوزى جاڭا شابۋىلداردىڭ ماۋسىم ايىنىڭ سوڭىنداعى سوققىلاردان ءتورت-بەس ەسە اۋقىمدى ءارى قۋاتتى بولعانىن ايتتى. باسىلىم مالىمەتىنشە، تاراپتار اراسىنداعى سوققىلار الماسۋى اقش پەن يراندى جاڭا قارىمتا ارەكەتتەر كەزەڭىنە يتەرمەلەۋى مۇمكىن. بۇل ءوز كەزەگىندە ەكى ەل پرەزيدەنتتەرى ءۇش اپتاعا جەتەر-جەتپەس ۋاقىت بۇرىن قول قويعان ءوزارا تۇسىنىستىك تۋرالى مەموراندۋمنىڭ تاعدىرىنا قاۋىپ توندىرمەك.
