Aqtauda Instagram äleumettık jelısı arqyly tauar satuǧa qatysty alaiaqtyq deregı boiynşa sotqa deiıngı tergeu jürıp jatyr, dep habarlaidy "Adyrna" ūlttyq portaly.
Küdıktılerdıŋ arasynda 360 myŋnan astam jazyluşysy bar paraqşanyŋ iesı de bar. Būl turaly Zakon.kz habarlady.
Maŋǧystau oblystyq polisiia departamentınıŋ mälımetınşe, küdıktı äleumettık jelıde Qytaidan türlı tauarlardy, sonyŋ ışınde premium sanattaǧy ydys-aiaq pen tūrmystyq tehnikany jetkızu turaly jarnama jariialaǧan. Önımder naryqtaǧy baǧadan edäuır arzan ūsynylǧan.
Tergeu nūsqasyna säikes, tauarlardy jarnamalau üşın 360 myŋnan astam jazyluşysy bar Instagram paraqşasynyŋ iesı tartylǧan. Jarnamalarda önımderdıŋ qolda bar ekenı, sapasy jäne Qazaqstanǧa jetkızu mümkındıgı turaly aqparat berılgen. Keiın azamattar körsetılgen bailanys nömırlerı arqyly habarlasyp, tauar satyp alu üşın jeke käsıpkerdıŋ esepşotyna aqşa audarǧan.
Alaida tapsyrys berılgen tauarlar jetkızılmegen. Tergeu deregıne süiensek, tüsken qarajat jeke maqsattarǧa jūmsalǧan. Qazırgı uaqytta ydys-aiaq pen tūrmystyq tehnikaǧa aqşa audarǧan azamattar jäbırlenuşı retınde anyqtalǧan.
Atalǧan derek boiynşa qylmystyq ıs qozǧaldy. Küdıktıler ūstalyp, uaqytşa ūstau izoliatoryna qamalǧan. Polisiia oqiǧanyŋ barlyq män-jaiyn anyqtau jäne özge de zardap şekken azamattardy tabu baǧytynda tergeu amaldaryn jürgızıp jatyr.
Qūqyq qorǧau organdary azamattardy äleumettık jelı arqyly tauar satyp alǧanda saq boluǧa, satuşy turaly aqparatty tekseruge jäne kümändı esepşottarǧa aqşa audarmauǧa şaqyrdy.
Tergeu müddesıne bailanysty özge aqparat jariialanbaidy.
