مەملەكەت باسشىسى قاسىم-جومارت توقاەۆ يسپانيانىڭ «اتلەتيكو مادريد» فۋتبول كلۋبىنىڭ باس ديرەكتورى ميگەل انحەل حيل مارينمەن كەزدەستى، دەپ حابارلايدى “ادىرنا”.
تاراپتار قازاقستاندا فۋتبولدى دامىتۋ جانە ەكىجاقتى ىنتىماقتاستىقتى نىعايتۋ ماسەلەلەرىن تالقىلادى.
اقوردانىڭ مالىمەتىنشە، پرەزيدەنت «اتلەتيكو مادريد» كلۋبىمەن ورناتىلعان ىنتىماقتاستىقتى جوعارى باعالاپ، قوناقتىڭ قازاقستانعا ساپارى سەرىكتەستىكتى جاڭا دەڭگەيگە كوتەرۋگە مۇمكىندىك بەرەتىنىن اتاپ ءوتتى.
كەزدەسۋ بارىسىندا قازاقستاندا فۋتبول ينفراقۇرىلىمىن جاڭعىرتۋ، زاماناۋي جاتتىعۋ بازالارىن سالۋ جانە جاس ويىنشىلاردى دايارلاۋ باعىتىندا اتقارىلىپ جاتقان جۇمىستار ءسوز بولدى. سونداي-اق فۋتبول كلۋبتارىن جەكەشەلەندىرۋ ۇدەرىسى مەن FIFA-مەن بىرلەسىپ، ەلىمىزدىڭ وڭىرلەرىندە بالالارعا ارنالعان 100-دەن استام فۋتبول الاڭىن سالۋ باستاماسى ايتىلدى.
پرەزيدەنت قاسىم-جومارت توقاەۆ يسپانيا قۇراماسى مەن يسپانيالىق فۋتبول مەكتەبىنىڭ تاجىريبەسىن زەردەلەپ، ونى قازاقستاندىق جاس فۋتبولشىلاردى دايارلاۋ ىسىندە قولدانۋعا مۇددەلى ەكەنىن جەتكىزدى.
ءوز كەزەگىندە ميگەل انحەل حيل مارين الماتى وبلىسىنداعى «اتلەتيكو مادريد» اكادەمياسىنىڭ ينفراقۇرىلىمىنا وڭ باعا بەرىپ، ونىڭ بولاشاقتا فۋتبولعا ارنالعان جەتەكشى وقۋ-جاتتىعۋ كەشەندەرىنىڭ بىرىنە اينالاتىنىن اتاپ ءوتتى.
كەزدەسۋ سوڭىندا مەملەكەت باسشىسى ميگەل انحەل حيل ءماريندى قازاقستاندا فۋتبولدى دامىتۋعا قوسقان ۇلەسى ءۇشىن II دارەجەلى «دوستىق» وردەنىمەن ماراپاتتادى.
