Memleket basşysy Qasym-Jomart Toqaev İspaniianyŋ «Atletiko Madrid» futbol klubynyŋ bas direktory Migel Anhel Hil Marinmen kezdestı, dep habarlaidy “Adyrna”.
Taraptar Qazaqstanda futboldy damytu jäne ekıjaqty yntymaqtastyqty nyǧaitu mäselelerın talqylady.
Aqordanyŋ mälımetınşe, prezident «Atletiko Madrid» klubymen ornatylǧan yntymaqtastyqty joǧary baǧalap, qonaqtyŋ Qazaqstanǧa sapary serıktestıktı jaŋa deŋgeige köteruge mümkındık beretının atap öttı.
Kezdesu barysynda Qazaqstanda futbol infraqūrylymyn jaŋǧyrtu, zamanaui jattyǧu bazalaryn salu jäne jas oiynşylardy daiarlau baǧytynda atqarylyp jatqan jūmystar söz boldy. Sondai-aq futbol klubtaryn jekeşelendıru üderısı men FIFA-men bırlesıp, elımızdıŋ öŋırlerınde balalarǧa arnalǧan 100-den astam futbol alaŋyn salu bastamasy aityldy.
Prezident Qasym-Jomart Toqaev İspaniia qūramasy men ispaniialyq futbol mektebınıŋ täjıribesın zerdelep, ony qazaqstandyq jas futbolşylardy daiarlau ısınde qoldanuǧa müddelı ekenın jetkızdı.
Öz kezegınde Migel Anhel Hil Marin Almaty oblysyndaǧy «Atletiko Madrid» akademiiasynyŋ infraqūrylymyna oŋ baǧa berıp, onyŋ bolaşaqta futbolǧa arnalǧan jetekşı oqu-jattyǧu keşenderınıŋ bırıne ainalatynyn atap öttı.
Kezdesu soŋynda memleket basşysy Migel Anhel Hil Marindı Qazaqstanda futboldy damytuǧa qosqan ülesı üşın II därejelı «Dostyq» ordenımen marapattady.
