شىمكەنت قالاسىندا رەسپۋبليكا كۇنى مەرەكەسى قارساڭىندا «Republic Day» جانە «Bereke Fest» رەسپۋبليكالىق اكتسيالارى وتۋدە. 2026 جىلعى 17 قازاندا باستالعان ناۋقاندار 27 قازانعا دەيىن جالعاسادى. اكتسيالار اياسىندا ساتىپ الۋشىلارعا ءتۇرلى تاۋارلار تومەندەتىلگەن باعامەن ۇسىنىلۋدا.
جالپىرەسپۋبليكالىق ناۋقاندى قازاقستان رەسپۋبليكاسى ساۋدا جانە ينتەگراتسيا مينيسترلىگى شىمكەنت قالاسىنىڭ اكىمدىگىمەن بىرلەسىپ ۇيىمداستىردى. اكتسيالاردىڭ باستى ماقساتى — تاۋارلاردىڭ حالىققا قولجەتىمدىلىگىن ارتتىرۋ، تۇتىنۋشىلىق سۇرانىستى قولداۋ جانە وتاندىق وندىرۋشىلەردىڭ ونىمدەرىن وتكىزۋ مۇمكىندىكتەرىن كەڭەيتۋ.
«فيركان City» جانە «Mega Planet» ساۋدا ورتالىقتارىندا كەلۋشىلەرگە ارناپ مۋزىكالىق باعدارلاما ۇيىمداستىرىلدى. ساۋدا گالەرەيالارىندا دومبىرا مەن باياننىڭ ءۇنى شىرقالىپ، ۇلتتىق اۋەندەر اۋەلەدى. قازاقتىڭ حالىق اندەرىمەن قاتار، وتاندىق ورىنداۋشىلاردىڭ تانىمال شىعارمالارى ورىندالدى.
مۋزىكالىق باعدارلاما كورەرمەندەرگە ۇلتتىق مۇرانىڭ ماڭىزىن تاعى ءبىر مارتە سەزىندىردى.
ۇلتتىق اندەر مەن داستۇرلەر — تاريحىمىز بەن رۋحاني مۇرامىزدىڭ ماڭىزدى بولىگى. مۇنداي كونتسەرتتەر ءارتۇرلى بۋىن وكىلدەرىنە ءتول مادەنيەتىمىزبەن جاقىنىراق تانىسۋعا، سۇيىكتى شىعارمالارىن ەسكە تۇسىرۋگە جانە حالىقتىڭ بىرلىگىن سەزىنۋگە مۇمكىندىك بەرەدى.
مەرەكەلىك ءىس-شارادا يەيبىر تاۋارلارعا 50 پايىزعا دەيىن جەڭىلدىك قاراستىرىلعان. ساۋدا سورەلەرىندە ەرلەر مەن ايەلدەر كيىمى، اياق كيىم، كادەسىيلار، ىدىس-اياق جانە ۇيگە قاجەتتى ءتۇرلى بۇيىمدار ۇسىنىلعان. مۇندا وتباسىنىڭ ءار مۇشەسىنە قاجەتتى كيىم-كەشەك تاڭداپ، جاقىندارىنا سىيلىق الۋعا نەمەسە تۇرمىسقا قاجەتتى زاتتاردى ساتىپ الۋعا بولادى. سونىمەن قاتار، ساتىپ الۋشىلارعا ءسۇت جانە ەت ونىمدەرىن قوسا العاندا، ازىق-تۇلىك، تۇرمىستىق حيميا مەن ۇيگە قاجەتتى تاۋارلار ۇسىنىلادى. ولاردىڭ جەكەلەگەن تۇرلەرىنە دە 50 پايىزعا دەيىن جەڭىلدىك جاسالعان.
رەسپۋبليكا كۇنى قارساڭىندا مۇنداي ۇسىنىستار قوناق كۇتىپ، مەرەكەلىك داستارقان ازىرلەۋگە دايىندالىپ جاتقان وتباسىلار ءۇشىن اسا ءتيىمدى. شىمكەنت تۇرعىندارىنىڭ ايتۋىنشا، الدا ۇلكەن مەرەكە كەلە جاتىر. بۇل كۇنى اعايىن-تۋىس باس قوسىپ، جاقىندارىن قوناققا شاقىرىپ، مول داستارقان جايادى. سوندىقتان جەڭىلدىكتەردىڭ دەر كەزىندە ۇيىمداستىرىلعانى قۋانتادى.
كاسىپكەرلەر ءۇشىن دە اكتسياعا قاتىسۋ ءوز ونىمدەرىنە دەگەن قىزىعۋشىلىقتى ارتتىرىپ، تاۋارلارىن ارنايى باعامەن ۇسىنۋعا مۇمكىندىك بەردى.
ء«بىز رەسپۋبليكا كۇنىنە ارنالعان اكتسياعا قۋانا قوسىلدىق. ءتۇرلى تاۋارلارعا ارنايى ۇسىنىستار دايىندادىق. اركىم وزىنە قاجەتتى زاتتى تاۋىپ نەمەسە جاقىندارىنا سىيلىق تاڭداۋعا مۇمكىندىگى بار»، — دەيدى ساتۋشىلار.
قالا اكىمدىگىنىڭ مالىمەتىنشە، شىمكەنتتە ءوتىپ جاتقان ەكى رەسپۋبليكالىق اكتسياعا 26 ساۋدا نىسانى قاتىسۋدا.
