Şymkent qalasynda Respublika künı merekesı qarsaŋynda «Republic Day» jäne «Bereke Fest» respublikalyq aksiialary ötude. 2026 jylǧy 17 qazanda bastalǧan nauqandar 27 qazanǧa deiın jalǧasady. Aksiialar aiasynda satyp aluşylarǧa türlı tauarlar tömendetılgen baǧamen ūsynyluda.
Jalpyrespublikalyq nauqandy Qazaqstan Respublikasy Sauda jäne integrasiia ministrlıgı Şymkent qalasynyŋ äkımdıgımen bırlesıp ūiymdastyrdy. Aksiialardyŋ basty maqsaty — tauarlardyŋ halyqqa qoljetımdılıgın arttyru, tūtynuşylyq sūranysty qoldau jäne otandyq öndıruşılerdıŋ önımderın ötkızu mümkındıkterın keŋeitu.
«Firkan City» jäne «Mega Planet» sauda ortalyqtarynda keluşılerge arnap muzykalyq baǧdarlama ūiymdastyryldy. Sauda galereialarynda dombyra men baiannyŋ ünı şyrqalyp, ūlttyq äuender äueledı. Qazaqtyŋ halyq änderımen qatar, otandyq oryndauşylardyŋ tanymal şyǧarmalary oryndaldy.
Muzykalyq baǧdarlama körermenderge ūlttyq mūranyŋ maŋyzyn taǧy bır märte sezındırdı.
Ūlttyq änder men dästürler — tarihymyz ben ruhani mūramyzdyŋ maŋyzdy bölıgı. Mūndai konsertter ärtürlı buyn ökılderıne töl mädenietımızben jaqynyraq tanysuǧa, süiıktı şyǧarmalaryn eske tüsıruge jäne halyqtyŋ bırlıgın sezınuge mümkındık beredı.
Merekelık ıs-şarada ieibır tauarlarǧa 50 paiyzǧa deiın jeŋıldık qarastyrylǧan. Sauda sörelerınde erler men äielder kiımı, aiaq kiım, kädesyilar, ydys-aiaq jäne üige qajettı türlı būiymdar ūsynylǧan. Mūnda otbasynyŋ är müşesıne qajettı kiım-keşek taŋdap, jaqyndaryna syilyq aluǧa nemese tūrmysqa qajettı zattardy satyp aluǧa bolady. Sonymen qatar, satyp aluşylarǧa süt jäne et önımderın qosa alǧanda, azyq-tülık, tūrmystyq himiia men üige qajettı tauarlar ūsynylady. Olardyŋ jekelegen türlerıne de 50 paiyzǧa deiın jeŋıldık jasalǧan.
Respublika künı qarsaŋynda mūndai ūsynystar qonaq kütıp, merekelık dastarqan äzırleuge daiyndalyp jatqan otbasylar üşın asa tiımdı. Şymkent tūrǧyndarynyŋ aituynşa, alda ülken mereke kele jatyr. Būl künı aǧaiyn-tuys bas qosyp, jaqyndaryn qonaqqa şaqyryp, mol dastarqan jaiady. Sondyqtan jeŋıldıkterdıŋ der kezınde ūiymdastyrylǧany quantady.
Käsıpkerler üşın de aksiiaǧa qatysu öz önımderıne degen qyzyǧuşylyqty arttyryp, tauarlaryn arnaiy baǧamen ūsynuǧa mümkındık berdı.
«Bız Respublika künıne arnalǧan aksiiaǧa quana qosyldyq. Türlı tauarlarǧa arnaiy ūsynystar daiyndadyq. Ärkım özıne qajettı zatty tauyp nemese jaqyndaryna syilyq taŋdauǧa mümkındıgı bar», — deidı satuşylar.
Qala äkımdıgınıŋ mälımetınşe, Şymkentte ötıp jatqan ekı respublikalyq aksiiaǧa 26 sauda nysany qatysuda.
