Almatydaǧy №12 jedel medisinalyq järdem qosalqy stansiiasynyŋ mamandary bır täulıkte jüzdegen şaqyrtu qabyldap, adam ömırın saqtap qalu üşın küresedı. «Adyrna» ūlttyq portaly aq halattylardyŋ bır auysymyna qatysyp, olardyŋ jūmysynyŋ qyr-syrymen tanysty.
№12 jedel medisinalyq järdem qosalqy stansiiasynda 19 brigada men 257 qyzmetker bar. Olar tört auysymmen jūmys ısteidı. Mūndaǧy taŋǧy auysym saǧat 7:30-dan bastalady. Qyzmetkerler jūmysqa kelgen boida dene qyzuyn ölşep, arnaiy kiımderın kiedı. Alǧaşqy mındetterdıŋ bırı – medisinalyq qūral-jabdyqtardyŋ tolyqtyǧy men jaramdylyǧyn tekseru. Sebebı şūǧyl şaqyrtu tüskende är minut qymbat.
Feldşer Maǧjan Äbdıläşımmūlynyŋ aituynşa, medisinalyq sömkede nauqasqa alǧaşqy kömek körsetuge qajettı qūraldar boluy kerek. Sondyqtan mamandar är auysym aldynda jabdyqtardy tügeldep, olardyŋ jūmysqa jaramdylyǧyna köz jetkızedı.
«Bır sömkenıŋ özı 10 kelını qūraidy. Onyŋ ışındegı därı-därmekterdı tügeldei tekserıp, şaqyrtudan keiın ornyn tolyqtyryp otyramyz», - deidı maman.
Brigadanyŋ daiyndyǧy mūnymen şektelmeidı. Kölıktıŋ ışındegı medisinalyq apparattar da tekserıledı. Feldşer Aiajan Darhanqyzy elektrokardiograf, ökpenı jasandy jeldetu apparaty jäne basqa da qūrylǧylardyŋ qyzmetın tüsındırdı. Būl jabdyqtar nauqastyŋ jaǧdaiyn baǧalap, şūǧyl medisinalyq kömek körsetuge mümkındık beredı.
«Kölıktıŋ ışındegı eŋ qymbat ärı eŋ qajet qūrylǧy – Lukas apparaty. Jürek kenetten toqtaǧanda osymen massaj jasaidy. Būl qazır adamdardyŋ ornyn almastyryp otyr. Jiı qoldanatyn qūrylǧylarymyzdyŋ bırı”, - deidı Aiajan.
ŞAQYRTUDY SALALAITYN – DİSPETChER
Jedel järdemnıŋ jūmysy kölık qozǧalǧan sätten emes, telefon qoŋyrauynan bastalady. Şaqyrtudy qabyldaityn dispetcher nauqastyŋ jaǧdaiy turaly mälımet jinap, qajettı aqparatty tiıstı brigadaǧa jetkızedı.
Dispetcher Aikerım Ǧabitqyzynyŋ sözınşe, qoŋyrau kezınde nauqastyŋ aty-jönın jäne jaǧdaiyna qatysty maŋyzdy mälımetterdı anyqtau qajet. Alynǧan aqparat mamandardyŋ şaqyrtuǧa daiyndaluyna kömektesedı.
«Bız täulıgıne 300-ge juyq şaqyrtu qabyldaimyz. Nauqas bızge habarlasqannan keiın, kategoriiaǧa qarai brigada jıberemız. Bır men ekınşı kategoriiaǧa köp basymdylyq berıledı. Öitkenı, ol sanattaǧy nauqastarǧa epilepsiia, jürek talmasy, sozylmaly aurulary bar nemese öte auyr jaǧdaidaǧy nauqastar jatady. Şaqyrtu köp bolǧan kezde, sanattaryna qarai, brigadalardy bölıp otyramyz», - deidı Aikerım.
ALǦAŞQY ŞAQYRTU – ALTY AILYQ SÄBİ
Feldşerlermen bırge alǧaşqy şaqyrtuǧa da bardyq. Būl joly medisinalyq kömek alty ailyq säbige qajet boldy. Bala tösekten qūlap ketken. Brigada qajettı qūraldaryn alyp, oqiǧa ornyna dereu attandy.
Mamandar balanyŋ jaǧdaiyn baǧalap, alǧaşqy kömek körsettı. Keiın säbidı balalar auruhanasyna jetkızdı.
Är şaqyrtudyŋ öz erekşelıgı bar. Bırınde nauqasqa şūǧyl kömek qajet bolsa, endı bırınde onyŋ jaǧdaiyn baǧalap, ärı qarai em aluyna jaǧdai jasau maŋyzdy. Sondyqtan medisina qyzmetkerlerı ärtürlı jaǧdaiǧa daiyn boluy kerek.
«JEDEL JÄRDEMGE JOL BERMEITINDER BAR»
Jedel järdem brigadasynyŋ jūmysynda jürgızuşınıŋ rölı de erekşe. Ol medisina qyzmetkerlerın oqiǧa ornyna mümkındıgınşe jyldam ärı qauıpsız jetkızuge tiıs. Qala köşelerındegı qozǧalys, keptelıs pen şaqyrtudyŋ şūǧyldyǧy jürgızuşıden mūqiiattylyq pen käsıbilıktı talap etedı.
Jedel järdem kölıgınıŋ jürgızuşısı Majit Amrullaūly üşın de är şaqyrtu – ülken jauapkerşılık.
«Qazır jürgızuşıler jedel järdem kölıgıne jol berudı mındet dep qarap, qalyptastyryp alǧan. Bıraq keide muzykasyn qatty qosyp alǧan jastar baiqamai qalyp jatady. Sirenany qosyp qoisaq ta, estımei, jol bermei ötetınder bar. Amal joq, olardy kütuge tura keledı. Degenmen är minut bızge qymbat», - deidı Majit Amrullaūly.
Auysym arasyndaǧy demalys uaqyty naqty josparǧa baǧyna bermeidı. Brigada bır şaqyrtudan oralǧan soŋ kelesı mekenjaiǧa qaita attanuy mümkın.
Stansiiadaǧy tynyştyq ta ūzaqqa sozylmaidy. Kezektı qoŋyrau tüsıp, mamandar taǧy da jolǧa daiyndalady. Bız de brigadanyŋ jūmysyn baqylap jürgende, olardyŋ bır şaqyrtudan ekınşısıne qalai auysatynyn kördık. Ekınşı şaqyrtuda es-tüssız jatqan er adamǧa baryp, janūşyra kömek körsetken mamandardyŋ qyzmetıne kuä boldyq.
«EŊ AUYRY – ÖLIM JAǦDAIYN ESTIRTU»
Jedel järdem qyzmetkerlerınıŋ denı – jastar. Solardyŋ bırı – 24 jastaǧy feldşer Maǧjan Äbdıläşımūly. Ol jūmysqa ornalasqan bes jyl ışınde türlı jaǧdaiǧa tap bolǧan. Onyŋ ışınde ömır men ölım arasynda jatqan nauqastarǧa kömek körsetu jäne aiy-künı jetken äieldı bosandyru da bar.
«Men osydan bır-ekı jyl būryn egız qyzdardyŋ ömırge keluıne sebepşı bolyp, olardyŋ kındık äkesı atandym. Alǧaş ret mūndai şaqyrtuǧa baryp tūrsam da, jauapkerşılıktı sezınıp, bar küşımdı saldym. Mülde ūmytpaimyn. Basqa da türlı şaqyrtular bolyp tūrady. Qandai şaqyrtu tüsedı, soǧan jıberedı, taŋdamaimyz. Eŋ auyry – ölım jaǧdailaryn estırtu, öte qiyn», - deidı Maǧjan.
Mūndai sätter mamannan tek käsıbi bılımdı ǧana emes, sabyr men jyldam şeşım qabyldaudy da talap etedı.
«Bız özımızdıŋ qauıpsızdıgımız üşın 227 būiryq boiynşa aiaq kiımımızdı şeşıp kırmeimız. Ony kei adamdar tüsıne bermeidı. Keide agressiia körsetetın de nauqastar bar. Degenmen, nauqastarǧa kömek körsetıp, üzılgen ümıtın jalǧai alsam, maǧan sol küş beredı. Bır sözben aitqanda, adamnyŋ ömırı men ölımınıŋ arasyndaǧy köpırdeimız», - deidı därıger.
Jedel järdem qyzmetkerlerınıŋ jūmysy syrt közge kölıkke mınıp, şaqyrtuǧa barumen ǧana şekteletındei körınuı mümkın. Alaida är sapardyŋ aldynda daiyndyq, är şaqyrtudyŋ artynda jauapkerşılık, al är nauqastyŋ jaǧdaiynda jeke şeşımdı qajet etetın sätter bar.
Bır kün. Bırneşe şaqyrtu. San türlı taǧdyr. №12 jedel medisinalyq järdem qosalqy stansiiasyndaǧy bır auysym bızge osy mamandyqtyŋ kündelıktı tynysyn körsettı. Al aq halattylar üşın būl – üirenşıktı jūmys yrǧaǧy ǧana emes, adam ömırıne jauap beretın ülken mındet.
Dana Nūrmūhanbet
“Adyrna” ūlttyq portaly
