دەنساۋلىق ساقتاۋ ءمينيسترى جەدەل جاردەم كولىكتەرىنىڭ ابدەن توزعانىن راستادى، دەپ حابارلايدى “ادىرنا” ۇلتتىق پورتالى.
دەنساۋلىق ساقتاۋ مينيسترلىگى جەدەل جاردەمگە قاتىستى ۇيعارىمىن جاريالادى.
قازاقستاندا جەدەل مەديتسينالىق جاردەم (جمج) قىزمەتى 20 دەربەس ستانتسيادان، 98 قالالىق قوسالقى ستانتسيادان تۇرادى. بۇعان قوسا، 232 اۋداندىق بولىمشەلەردە 1 486 كوشپەلى بريگادا جۇمىس ىستەيدى: قالالاردا – 904, اۋىلداردا – 582.
مينيسترلىكتىڭ مالىمەتىنشە، 2024 جىلدىڭ 9 ايىنىڭ قورىتىندىسىندا جمج بريگادالارىن شاقىرتۋ سانى 4,4%-عا ارتقان. جىل باسىنان بەرى تۇرعىندار جەدەل جاردەمدى 6,3 ميلليون رەت شاقىرتقان. بىلتىرعى 9 ايدا – 6,1 ميلليون شاقىرتۋ تىركەلگەن.
ونىڭ ۇستىنە دەنساۋلىق ساقتاۋ ءمينيسترىنىڭ 2020 جىلعى 30 قاراشاداعى №قر دسم-225/2020 بۇيرىعىمەن بەكىتىلگەن "جەدەل مەديتسينالىق جاردەم، ونىڭ ىشىندە مەديتسينالىق اۆياتسيانى تارتا وتىرىپ كورسەتۋ قاعيدالارىنا" سايكەس، بارلىق كەلىپ تۇسكەن شاقىرتۋلار جەدەلدىلىكتىڭ 4 ساناتى بويىنشا ءبولىپ تاستالادى:
1-ءشى جەدەلدىلىك ساناتىنداعى شاقىرتۋ – ادام ومىرىنە تىكەلەي قاۋىپ ءتونىپ تۇرعان، شۇعىل تۇردە مەدكومەك كورسەتۋدى قاجەت ەتەتىن جاي-كۇي: جەدەل جاردەم كولىگى 10 مينۋت ىشىندە كەلىپ جەتۋگە ءتيىس.
2-ءشى جەدەلدىلىك ساناتىنداعى شاقىرتۋ – مەدكومەك كورسەتپەسە، وندا ومىرىنە قاۋىپ ءتونۋى مۇمكىن جاي-كۇي: 15 مينۋت ىشىندە كەلۋى شارت.
3-ءشى جەدەلدىلىك ساناتىنداعى شاقىرتۋ – مەدكومەك كورسەتپەسە، دەنساۋلىعىنا قاۋىپ ءتونۋى مۇمكىن جاي-كۇي: 30 مينۋت ىشىندە جەتۋگە مىندەتتى.
4-ءشى جەدەلدىلىك ساناتىنداعى شاقىرتۋ – ءجىتى اۋرۋىنان نەمەسە سوزىلمالى اۋرۋىنىڭ اسقىنۋىنان تۋىنداعان، اعزالار مەن جۇيەلەردىڭ كەنەتتەن بولعان جانە ايقىن كورىنەتىن بۇزىلۋلارىنسىز پاتسيەنتتىڭ ءومىرى مەن دەنساۋلىعىنا تىكەلەي جانە الەۋەتتى قاۋىپ توندىرمەيتىن پاتسيەنتتىڭ جاي-كۇيى: جمج-نى كۇتۋ 60 مينۋتقا دەيىن ۇزاۋى ىقتيمال. ودان اسپاۋى كەرەك.
ماجىلىسمەن دانابەك يسابەكوۆ دارىگەرلىك بريگادا تۋرالى ايتتى.
"قاعيدالاردا دارىگەرلىك بريگادانىڭ ديسپەتچەردەن پاتسيەنتكە دەيىن جەتۋ ۋاقىتى ايقىن بەلگىلەنگەن. دەگەنمەن، كەنتتەر مەن اۋىلداردا دا، ءتىپتى ءىرى قالالاردا دا نورمامەن بەلگىلەنگەن ۋاقىتتا جەدەل جاردەم قىزمەتىنىڭ جەتپەيتىنىن ءجيى ەستيمىز. مۇنداي جاعداي مەنىڭ اۋلەتىمدە دە ورىن الدى. ناقتىراق ايتقاندا، بيىلعى 23 شىلدەدە اكەم كەنەتتەن اۋىرىپ، جەدەل جاردەم قىزمەتىن ساعات 13:50-تە شاقىرتتىق. الايدا جەدەل جاردەم 30 مينۋتتان سوڭ كەلدى. بۇل ارالىقتا اكەمنىڭ جاعدايى وتە اۋىرلاپ قالدى. باسقا ەمەس، ءۇشىنشى مەگاپوليس شىمكەنتتىڭ جەدەل جاردەمى 2-ءشى جەدەلدىك ساناتىنداعى سىرقاتقا 15 مينۋتتا جەتۋگە ءتيىس ەدى. بىراق كەشىككەننەن كەيىن ءتيىستى جاردەمىن كورسەتە الماي، اكەمىزدەن ايىرىلىپ قالدىق", – دەپ ازالاندى ماجىلىسمەن دانابەك يسابەكوۆ.
دەپۋتات جەدەل جاردەمنىڭ ءوز جۇمىسىنا نەمقۇرايلى قاراماۋىندا سۇرادى.
"جەدەل جاردەم ءوز ۋاقىتىندا كەلسە، كوپ ازاماتىمىزدى اجالدان اراشالاپ قالۋعا مۇمكىندىك بولار ەدى. قاعيدانىڭ نورمالارى كوپ جاعدايدا ساقتالمايدى. كەيدە جەدەل جاردەم ءبىر ساعاتتان اسا كەشىگەدى. مۇنى قالاي "جەدەل جاردەم" دەپ اتاۋعا بولادى؟ ماسەلەن، اقش، كانادا، جاڭا زەلانديا، اۆستريا، يرلانديا جەدەل جاردەمى قىزمەتىنىڭ باستى ەرەكشەلىگى – وتە شۇعىل (ەكسترەننىي), شۇعىل (نەوتلوجنىي) دەپ ەكىگە ءبولىنىپ ناۋقاستارعا قىزمەت كورسەتەدى. وسى تاجىريبەنى بىزگە دە ەنگىزۋ قاجەت", – دەدى دەپۋتات دانابەك يسابەكوۆ.
