Bügın – körnektı jazuşy-dramaturg, Qazaqstannyŋ eŋbek sıŋırgen qairatkerı Rahymjan Otarbaevtyŋ tuǧan künı. Biyl qalamgerdıŋ 70 jyldyq mereitoiy atap ötılıp jatyr, dep habarlaidy «Adyrna» tılşısı.
Rahymjan Qasymǧaliūly 1956 jyly 19 qazanda Atyrau oblysy Qūrmanǧazy audanynda düniege kelgen. A.S. Puşkin atyndaǧy Oral pedagogikalyq institutyn (qazırgı BQU – red.) bıtırgen.
Är jyldarda «Oral öŋırı» gazetınde tılşı, qazaq tılı men ädebietı pänınıŋ mūǧalımı, Qazaq teleradio komitetınde redaktor, «Qazaq ädebietı» gazetınde, «Jalyn» almanahynda bölım meŋgeruşısı, Qyrǧyzstanda Qazaqstan elşılıgınıŋ attaşesı, Maŋǧystau oblystyq radiotelevidenie kompaniiasynyŋ töraǧasy, Atyrau oblystyq drama teatrynyŋ direktory, QR Prezidentı Äkımşılıgınde sektor meŋgeruşısı qyzmetterınde bolǧan.
Jazuşynyŋ «Şer», «Jūldyzdar qūlaǧan jer», «Jaiyq jyry», «Qaraşa qazdar qaitqanda», «Dauysyŋdy estıdım», «Otverjennyi mir» atty prozalyq jinaqtary jäne taŋdamaly şyǧarmalarynyŋ 2 tomdyǧy jaryq körgen. Jekelegen şyǧarmalary türık, arab, aǧylşyn tılderınde basylǧan.
«Beibarys sūltan», «Bas», «Naşaqor jaily novella», «Nūrjauǧan-ǧūmyr», «Syrym batyr», «Mūstafa Şoqai» syndy pesalary respublikalyq jäne şetel teatrlarynda sahnalanǧan.
Ol - Mahambet syilyǧynyŋ laureaty, Halyqaralyq Aitmatov akademiiasynyŋ akademigı, Atyrau qalasynyŋ jäne Atyrau oblysy Qūrmanǧazy audanynyŋ qūrmettı azamaty.
Jazuşy 2018 jyly 17 aqpanǧa qaraǧan tünı Atyrauda qaitys bolǧan.
Aita keteiık, 12 qazanda qalamgerdıŋ 70 jyldyǧyna arnalǧan halyqaralyq ǧylymi-täjıribelık konferensiia ötken edı. «Rahymjan Otarbaev mūrasy: ūlttyq ädebiet, tarihi sana jäne ruhani sabaqtastyq» taqyrybyndaǧy jiynǧa otandyq jäne şeteldık ǧalymdar, ädebiet zertteuşılerı men qoǧam qairatkerlerı qatysqan.
